Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 785 Hüküm no: 1026 Orijinal metin no: [121b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mâhımünir bt. Abdullah’ın süs ve ev eşyalarını âzatlı câriyesi Vildan’a hibe ettiği Mahmiye-i İstanbul’da Hasan Paşa mahallesinde sâkine Mâhımünir bt. Abdullah nâm hâtun tarafından ikrâr-ı âti’z-zikri tasdîka vekîl olduğu mezbûrenin zâtını ma‘rifet-i şer‘iyye ile ârifân olan Şaban b. Ali ve Mehmed b. Şaban nâm kimesneler şehâdetleriyle şer‘an sâbit olan Mehmed Beşe b. Mustafa nâm kimesne mahzarında ikrâr ve takrîr-i kelâm edip eşyâ-i memlûkemdem bir mushaf-ı şerîf ve üç zümrüd taşlı bir altın küpe ve yirmi bir miskāl bir çift endişe altın bilezik ve iki beledî döşek ve dört büyük yemeni yorgan ve beş Bursa yastığı ve iki kapaklı tencere ve dört lengerî sahan ve bir leğen ve bir ibrik ve iki minder ve iki ayaklı sandık ve bir Selânik orta keçesi ve iki yan keçesi mu‘takam müvekkile-i mezbûre Vildan’a hibe-i sahîha-i şer‘iyye ile hibe ve teslîm edip ol dahi meclis-i hibede ittihâb ve tesellüm ve kabûl eyledi ba‘de’l-yevm eşyâ-i mezkûre müvekkile-i mezbûre Vildan’ın emlâk-i mevhûbesidir keyfe mâ teşâ’ ve tahtâr mutasarrıfe olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu Fi’l-yevmi’s-sânî aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Umdetü erbâbi’t-tahrîr ve’l-kalem Ali Efendi Kāimmakām-ı rûznâmçe, Arak Ağa b. Mehmed Ağa, İmâm Ali Efendi, Hacı Mustafa Ser-oda, Mehmed Çelebi b. ( ) el-Müezzin.