Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 168 Hüküm no: 144 Orijinal metin no: [20b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Beşe b. Abdullah’ın menzil arsasının yarısını zevcesi Hadice Hatun bt. Abdullah’a sattığı Mahrûse-i Galata hâricinde Fındıklı kasabasında vâki‘ İbrahim Efendi mahallesinde sâkin Yusuf Beşe b. Abdullah mahfil-i şer‘de zevcesi Hadice Hâtun bt. Abdullah b. Abdülkerîm tarafından bey‘-i âti’z-zikri tasdîka vekîl-i sâbitü’l-vekâlesi olan işbu hâmilü’l-vesîka Serbölük İbrahim Çelebi b. Muharrem mahzarında ikrâr ve takrîr-i kelâm edip akd-i âtî sudûruna değin yedimde mülküm olup mahalle-i merkūmede vâki‘ bir tarafdan ba‘zen Ali Beşe ve ba‘zen Abdullah Beşe mülkleri ve bir tarafdan ba‘zen Fâtıma ve ba‘zen Saliha nâm hâtunlar mülkü ve bir tarafdan defter emîni ahuru ve bir tarafdan tarîk-i âm ile mahdûd mülk menzil arsasının nısf-ı şâyi‘ini bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcem müvekkile-i mezbûre Hadice Hâtun’a yirmi guruşa bey‘ u teslîm edip ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûru zevcem müşteriye-i mezbûre yedinden bi’t-tamâm alıp kabz eyledim fîmâ ba‘d arsa-i mahdûde-i merkūmenin nısf-ı şâyi‘i zevcem müşteriye-i mezbûrenin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin min-şehri Ramazâni’l-mübârek sene 1137. Şuhûdü’l-hâl: es-Sabikūn.