Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 167 Hüküm no: 143 Orijinal metin no: [20b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. Abdullah’ın menzilini Yusuf Beşe b. Abdullah’a sattığı Mahrûse-i Galata hâricinde Fındıklı kasabasına vâki‘ İbrahim Efendi mahallesi sâkinelerinden Saliha bt. Abdullah b. Abdülkerîm nâm hâtun tarafından bey‘-i câi’z-zikri ikrâra vekîli olduğu zât-ı mezbûreyi ma‘rifet-i şer‘iyye ile ârifân Abdullah Beşe b. Hasan ve Ömer Beşe b. Ahmed şehâdetleriyle mahzar-ı hasm-ı câhidde şer‘an sâbit olan zevci Ömer Çelebi b. Mahmud nâm kimesne mahfil-i şer‘de işbu râfi‘u’l-vesîka Yusuf Beşe b. Abdullah mahzarında bi’l-vekâle ikrâr ve takrîr-i kelâm edip akd-i âtî sudûruna değin zevcem müvekkile-i merkūme Saliha Hâtun yedinde mülkü olup mahalle-i mezbûrede vâki‘ bir tarafdan ba‘zen Ali Beşe ve ba‘zen Abdullah Beşe mülkleri ve bir tarafdan ba‘zen Fâtıma Hâtun mülkü ve ba‘zen müvekkile-i mezbûrenin âhar mülkü ve bir tarafdan defter emîni ahuru ve bir tarafdan tarîk-i âm ile mahdûd mülk menzil arsasını cemî‘ tevâbi‘ ve levâhıkı ve kâffe-i menâfi‘ ve merâfıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Yusuf Beşe’ye kırk guruşa bey‘ u teslîm eyledikden sonra ol dahi ber-minvâl-i muharrer iştirâ ve tesellüm ve kabûl eyledikden sonra semeni olan meblağ-ı mezbûr kırk guruşu müşterî-i mezbûr yedinden tamâmen alıp kabz eyledi ba‘de’l-yevm arsa-i mahdûde-i merkūme bi-cümletin mâ yeştemiluhâ müşterî-i mezbûr Yusuf Beşe’nin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis min-şehri Ramazâni’l-mübârek sene 1137. Şuhûdü’l-hâl: İmâm Mustafa Efendi b. el-Hâc Ahmed, Hasan Çelebi b. Abdullah, Saka Mustafa b. Ahmed, Ahmed Efendi b. eş-Şeyh Süleyman, Halil Çelebi b. Mustafa, Mustafa b. Ahmed.