Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 169 Hüküm no: 146 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgaki v. Manol’un mülk mahzenini Liyofer v. Yasori’ye sattığı Mahrûse-i Galata muzâfâtından Marmara nâhiyesine tâbi‘ Büyükkarye’de sâkin Yorgaki v. Manol nâm zimmî meclis-i şer‘de yine karye-i mezbûre sükkânından işbu sâhibü’r-rakīm Liyofer v. Yasori nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup karye-i mezbûrede vâki‘ bir tarafdan Andon Reis mülkü ve bir tarafdan Aristafo mülkü olan vîrâne ve bir tarafdan Nikola mülkü ve bir tarafdan sâhil-i bahri ile mahdûd tahtânî bir bâb oda ve bi’r-i mâ ve şarab-hâne ve bir fuçuyı müştemil mülk mahzenimi merkūm Liyofer’e tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz guruşa bey‘ ve mahallinde teslîm eylediğimde ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr yüz guruşu merkūm Liyofer yedinden bi’t-tamâm ve’l-kemâl ahz u kabz eyledim ba‘de’l-yevm mahzen-i mahdûd-ı mezkûr bi-cemî‘i mâ yeştemilühû ve yahvîhi merkūm Liyofer’in mülk-i müşterâsı olup keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-âşir min-şehri Ramazâni’l-mübârek sene 1137. Şuhûdü’l-hâl: es-Seyyid Ömer Çelebi b. Osman, Halil Çelebi b. Mustafa, Todori v. Yamandi, Lisyara v. Yani, Talalogo v. Yani, İlya v. Kiryako, Yorgaki v. Esteryo.