Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 169 Hüküm no: 147 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Beşe b. Mehmed’in küçük kızı Fâtıma’ya nafaka ödemesine hükmedildiği Mahrûse-i Galata muzâfâtından kasaba-i Fındıklı’da İbrahim Efendi mahallesinde sâkine ve zâtı ta‘rîf-i şer‘î ile mu‘arrefe olan Emine bt. İbrahim nâm hâtun meclis-i şer‘de zevc-i muhâlı‘ı İsmail Beşe b. Mehmed nâm kimesne mahzarında takrîr-i kelâm ve ta‘bîr ani’l-merâm edip mezbûr İsmail Beşe’nin firâşından hâsıla ve benden mütevellide bi-hakkı’l-hıdâne hacr ve terbiyemde olan sagīre kızım Fâtıma’nın nafaka ve kisve bahâya eşedd-i ihtiyâcı olmağın babası mezbûr İsmail Beşe üzerine kıbel-i şer‘den kadr-i kifâye meblağ farz ve takdîr olunması murâdımdır dedikde hâkim-i muvakkı‘-ı sadr-ı kitâb tûbâ-lehû ve hüsn- meâb efendi dahi sagīre-i mezbûrenin nafaka ve kisve ve levâzım-ı sâiresiʼçün babası mezbûr İsmail Beşe üzerine târih-i kitâbdan yevmî bi’r-rızâ beşer akçe farz ve takdîr edip meblağ-ı mefrûz-ı mezkûru sagīre-i mezbûre Fâtıma’nın nafaka ve kisve ve levâzım-ı sâiresine harc ve sarfa ve lede’l-iktizâ istidâneye ve ınde’z-zafer babası mezbûr İsmail Beşe üzerine rücû‘a mezbûre Emine Hâtun’a izin vermeğin mâ hüve’l-vâki bi’l-ibtigā ketb olundu. Fî gurre-i Şa‘bâni’l-mu‘azzam sene 1137. Şuhûdü’l-hâl: İmâm Mustafa Efendi b. el-Hâc Ahmed, Ömer Ağa b. el-Hâc ( ), İbrahim Çelebi b. Hüseyin, Ahmed Çelebi b. Mustafa, Ali Beşe b. Ali, Molla Süleyman b. Mustafa Efendi.