Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 253 Hüküm no: 259 Orijinal metin no: [37a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Mehmed Çelebi b. el-Hâc Abdulbâki’nin istiğlâl yoluyla el-Hâc Salih b. Ali’den ödünç para aldığı Mahrûse-i Galata’da Şehsuvar mahallesinde sâkin es-Seyyid Mehmed Çelebi b. el-Hâc Abdulbâki nâm kimesne meclis-i şer‘de merhûm Garik Ali Bey nâm sâhibü’l-hayrın vakfı mütevellîsi olan işbu râfi‘u’l-kitâb el-Hâc Salih b. Ali nâm kimesne mahzarında ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan Mahmud Çelebi menzili ve bir tarafdan Uncu Süleyman mülkü ve bir tarafdan Haffâf Abdi veresesi mülkleri ve bir tarafdan tarîk-i âm ile mahdûd tabaka-i ulyâda üç bâb oda ve iki kenîf ve tahta-bend ve tabaka-i vüstâda iki bâb oda ve bir kilâr ve kenîf ve süflâda mahtab ve bi’r-i mâ ve havluyu müştemil mülk menzilimi bi-tarîki’l-istiğlâl mütevellî-i mezbûr el-Hâc Salih’e yüz seksen guruşa bey‘ u teslîm eylediğimde ol dahi ber-vech-i muharrer yedinde olan mâl-ı vakf-ı mezbûr ile iştirâ ve tesellüm ve kabûl eyledikden sonra meblağ-ı mezbûr yüz seksen guruşu mâl-ı vakf-ı mezbûrdan olmak üzere müteveffâ-yı mezbûr el-Hâc Salih yedinden bi’t-tamâm ahz u kabz eylediğimden sonra mezbûr el-Hâc Salih menzil-i mahdûd-ı mezkûru ba‘de’t-tahliyeti’ş-şer‘iyye ve’t-tekābuzi’l-mer‘î senevî yirmi yedişer guruşa olmak üzere târih-i kitâbdan iki sene tamâmına değin elli dört guruşa bana îcâr ve teslîm edip ben dahi ber-vech-i muharrer istîcâr ve kabûl eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-ışrîn min-Zilka‘deti’ş-şerîfe sene 1137. Şuhûdü’l-hâl: Mustafa Efendi b. Hasan, Ali Efendi b. Ömer, Ahmed Efendi b. Süleyman, İbrahim b. Muharrem, Halil Çelebi b. Mustafa, Mehmed b. Ahmed, Ahmed b. Mustafa.