Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 252 Hüküm no: 258 Orijinal metin no: [37a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife bt. el-Hâc Halil’in dokuzda bir hissesine sahip olduğu menzildeki hissesini el-Hâc İbrahim’e sattığı Mahrûse-i Galata muzâfâtından kasaba-i Fındıklı’da Avni Efendi mahallesinde sâkine Şerife bt. el-Hâc Halil b. Mustafa nâm hâtunun li-ebeveyn karındaşı ve tarafından bey‘-i âti’z-zikre vekîli olduğu zât-ı mezbûreyi ma‘rifet-i şer‘iyye ile ârifân İmâm Ali Efendi b. Hasan ve Molla Mustafa b. Mehmed nâm kimesneler şehâdetleriyle sâbit ve vekâletine hükm-i şer‘î lâhik olan es-Seyyid Osman Çelebi b. el-Hâc Halil nâm kimesne meclis-i şer‘de li-ebin karındaşları işbu râfi‘u’l-kitâb İbrahim b. el-Hâc Halil nâm kimsene mahzarında bi’l-vekâle ikrâr ve takrîr-i kelâm edip kasaba-i mezbûrede el-Hâc Ali mahallesinde vâki‘ bir tarafdan Dellâk Ömer menzili ve bir tarafdan el-Hâc Süleyman menzili ve bir tarafdan tarîk-i hâs ve bir tarafdan tarîk-i âm ile mahdûd ulyâda iki bâb oda ve bir sofa vüstâda iki bâb oda ve bir sofa süflâda mahtab ve bi’r-i mâ ve kenîf ve bahçeyi müştemil mülk menzilin dokuz sehimde bir sehm-i şâyi‘i akd-i âtî sudûruna değin müvekkile-i mezbûrenin silk-i mülkünde münselik olmağla müvekkile-i mezbûre dahi menzil-i mahdûd-ı mezkûrda olan bir sehm hisse-i şâyi‘asını tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr el-Hâc İbrahim’e yirmi guruşa bey‘ u temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi beş guruşu mezbûr el-Hâc İbrahim yedinden tamâmen ahz u kabz eyledi ba‘de’l-yevm menzil-i mahdûd-ı mezkûrda olan bir sehm hisse-i şâyi‘ası mezbûr el-Hâc İbrahim’in mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis aşer min-Zilka‘deti’ş-şerîfe sene 1137. Şuhûdü’l-hâl: Berber Usta Mehmed, Mustafa Beşe b. Hasan, Abdullah b. Ali, Abdurrahman b. Ali, İbrahim b. Muharrem, Halil Çelebi b. Mustafa, Mehmed b. Ahmed.