Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 254 Hüküm no: 261 Orijinal metin no: [37a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Roksandra bt. İskerletzade Aleksandra’nın mülk menzilini Sahpos v. Manas’a sattığı Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden mevlânâ Mustafa Efendi b. Hasan irsâl olunup ol dahi mahrûse-i Galata muzâfâtından kasaba-i Beşiktaş nâhiyesine tâbi‘ Arnavud nâm karyede sâkine Roksandra bt. İskerletzâde Aleksandra nâm Nasrâniyenin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf-i nebevî eyledikde şahsı sadrî kebîr oğulları olup hâlâ dîvân tercümânı olan Liguraşko ve Aleksandra veledey Metah ta‘rîfleriyle mu‘arrefe olan merkūme Roksandre meclis-i ma‘kūd-ı mezbûrda sarraf tâifesinden işbu sâhibü’r-rakīm Sahpos v. Manas nâm Ermeni muvâcehesinde bi-tav‘ihâ ikrâr ve takrîr-i kelâm edip akd-i âtî sudûruna değin silk-i mülkümde münselik olup karye-i mezbûrede vâki‘ bir tarafdan ba‘zen Kuyumcu Panayot v. Yani ve ba‘zen Uskolik ve ba‘zen Aleksandrı v. Hristo nâm zimmîler mülkleri ve bir tarafdan tarîk-i [37b] âmm ve bir tarafdan ba‘zen Kürkcü Panayot v. Manol ve ba‘zen tarîk-i âm ve bir tarafdan sâhil-i bahr ile mahdûd hâriciye ve dâhiliyesi fevkānî altı bâb oda ve bir sofa ve iki halvetli bir hamâm ve camekân ve bir kilâr ve bir sagīr matbah ve bir kebîr matbah ve kenîf ve tahtânî on iki bâb oda ve iki kıt‘a kârgir mahzen ve bir sofa ve üç kenîf ve liman ve üç bi’r-i mâ ve merkūm Panayot tarfında damlalık kurbünde kârizi ve eşcâr-ı müsmire ve gayr-i müsmireli bahçeyi müştemil yalı ta‘bîr olunur işbu mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık merkūm Sahpos’a tarafeynden îcâb ve kabûlü hâvî bey‘-i bâtt-ı sahîh-i şer‘î ile sekiz bin guruş ile adedi mechûl bir kabza fülûsa bey‘ u teslîm eylediğimde ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr Sekiz bin guruş ile adedi mechûl bir kabza fülûsu müşterî-i merkūm Sahpos yedinden bi’t-tamâm ahz u kabz ve sâbıku’z-zikr bir kabza fülûsu işbu meclis-i şer‘de itlâf ve izâ‘at eyledim ba‘de’l-yevm menzil-i mahdûd-ı mezkûr bi-cemî‘i mâ yeştemilühû ve yahvîhi müşterî-i merkūm Sahpos’un mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î vâki‘ hâli mevlânâ-yı mezkûr mahallinde ketb ü tahrîr ve ma‘an ba‘s olunan Serbölük Halil Çelebi b. İbrahim ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis aşer min-Zilka‘deti’ş-şerîfe sene 1137. Şuhûdü’l-hâl: Fahrü’l-akrân Kuyumcubaşı Süleyman Ağa b. Murad, İbrahim Efendi b. Hüseyin el-imâm, es-Seyyid el-Hâc Ahmed b. es-Seyyid Yusuf, el-Hâc Yusuf b. Abdülaziz, Hüseyin Usta b. Ahmed, Mustafa Çelebi b. Hüseyin, el-Hâc Mustafa b. Ya‘kub, Bölükbaşı İbrahim b. Hüseyin, Mehmed Çelebi b. Ali Bostani, Ahmed b. Bekir, Yasakcı es-Seyyid Ali Beşe, Mehmed Beşe b. Abdullah, Mehmed Çelebi b. Hüseyin berber, İsmail Beşe b. Hüseyin, Ali Beşe b. Musli, Mehmed Usta b. Hüseyin, İsmail b. Mahmud, Mihail v. Naima, Ariton v. Mardiros, Kirkor v. Asador, Filyos v. Mardiros, Ariton v. Nazar, Nişan v. Simaven, Dimitri v. Yani.