Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 255 Hüküm no: 262 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hallac taifesinin kethüdalığının tekrar Usta Halil b. Abdülcelil’e verildiği Mahrûse-i Galata ve tevâbi‘inde vâki‘ hallâc tâifesinin kethudâları işbu râfi‘u’l-vesîka Usta Halil b. Abdülcelil nâm kimesneden ber-vech-i âtî istihbâr-ı şer‘î sudûrundan sonra tâife-i merkūmenin müsin ve ihtiyârlarından Hasan b. Ahmed ve Ali b. Osman ve Mehmed Çelebi b. Ömer ve Ahmed b. Ali ve Mehmed b. Osman ve Ahmed b. Mehmed ve Mustafa b. Mehmed ve İsmail b. Hamza ve İbrahim b. Mustafa ve İbrahim b. Osman ve Mustafa Çelebi b. Ahmed ve el-Hâc Halil b. İbrahim ve es-Seyyid İbrahim b. es-Seyyid Osman ve Ali Beşe b. Ahmed ve Ahmed Beşe b. İsmail ve Hasan b. İbrahim nâm kimesneler ile Yorgi v. Aslan ve İstavri v. Todori ve Sava v. Aslan nâm zimmîler vesâirleri li-ecli’l-ihbâr meclis-i şer‘a hazırûn olup isre’l-istihbâr fi’l-hakīka kethudâmız olan mezbûr Usta Halil emânet ve diyânet birle ma‘rûf ve mu‘temed ve müstakīm kimesne olup hüsn-i sülûk üzere olmağla her vechile kendüden hoşnûd ve râzîler deyü mezbûrûndan her biri keyfiyet-i muharrereyi haber verip mârrü’z-zikr kethudâlık yine mezbûr Usta Halil üzerinde ibkā ve mukarrer kılınıp ve işbu hâzır bi’l-meclis Usta Ahmed b. Mehmed yiğitbaşı nasb ve ta‘yîn olunması iltimâs etmeleriyle zikr olunan kethudâlık tâife-i merkūmenin talebleriyle mezbûr Usta Halil üzerinde ibkā ve mukarrer olunup ve mezbûr Usta Ahmed tâife-i merkūmeye yiğitbaşı nasb ve ta‘yîn olunup mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis aşer min-Zilka‘deti’ş-şerîfe sene 1137. Şuhûdü’l-hâl: Serbölük Halil, Serbölük İbrahim Çelebi, Sırmakeş Mustafa, İbrahim b. Mustafa.