Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 284 Hüküm no: 301 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe b. İbrahim’in bir anbar ve bir odasını el-Hâc Mehmed Ağa b. Ahmed’e sattığı Fi’l-asl vilâyet-i Anadolu’da Amasra kazâsına tâbi‘ Oğnas nâm karye ahâlîsinden olup mahmiye-i İstanbul’da Sultan Bayezid semtinde İbrahim Paşa Câmi‘-i Şerifi kurbünde sâkin Hüseyin Beşe b. İbrahim nâm kimesne meclis-i şer‘de işbu râfi‘u’l-kitâb el-Hâc Mehmed Ağa b. Ahmed nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup karye-i mezbûrede vâki‘ ma‘lûmü’l-hudûd bir bâb mülk anbar ve bir bâb odamı tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr el-Hâc Mehmed Ağa’ya on beş guruşa bey‘ u temlîk eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr on beş guruşu mezbûr el-Hâc Mehmed Ağa yedinden tamâmen ahz u kabz edip zikr olunan anbar ve odayı mahallinde zabt ve tasarrufa mezbûr el-Hâc Mehmed Ağa’yı ba‘de’t-taslît sâlifü’z-zikr anbar ve odanın aynlarına ve gabn ve tağrîrlerine ve târih-i kitâba gelince sâir beynimizde cereyân eden ahz u i‘tâ ve mu‘âmelât-ı şettâya müte‘allika âmme-i da‘vâdan her birimiz âharın zimmetini ibrâ ve ıskāt eyledik ba‘de’l-yevm zikr olunan anbar ve oda mezbûr el-Hâc Mehmed Ağa’nın mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ min-Zilhicceti’ş-şerîfe sene 1137. Şuhûdü’l-hâl: el-Hâc Ömer b. Mehmed, es-Seyyid Mustafa b. Mehmed, Mahmud Beşe [b.] İbrahim, Ali Beşe b. Ahmed, Halil Çelebi b. Mustafa, İbrahim b. Mustafa.