Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 283 Hüküm no: 300 Orijinal metin no: [43a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Basdiyan v. Petro’nun kendisini bıçakla yaralayan Hasan b. Abdullah ile sulh olduğu Mahrûse-i Galata muzâfâtından İstinye nâhiyesine tâbi‘ Yeniköy’de Ayayorgi mahallesinde sâkin Basdiyan v. Petro nâm zimmî meclis-i şer‘de işbu râfi‘u’l-vesîka Hasan b. Abdullah nâm kimesne mahzarında ikrâr ve takrîr-i kelâm edip mezbûr Hasan târih-i kitâbdan kırk iki gün mukaddem Karadeniz sâhilinde vâki‘ Ahtabolu İskelesi’nde amden bi-gayrı hakkın sol ayağımın topuğu altından bıçak ile darb ve cerh edip damarı kat‘ olunmağla mezbûr Hasan’dan mûceb-i şer‘îsini taleb ve da‘vâ sadedinde olmuş idim el-hâletü hâzihî beynimize muslihûn tavassut edip da‘vâ-yı mezkûremden mezbûr Hasan ile beni on beş guruşa sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr on beş guruşu mezbûr Hasan yedinden tamâmen ahz u kabz eylediğimden sonra cerh-i mezbûra ve mâ yahdesü anhüye müte‘allika âmme-i da‘vâdan mezbûr Hasan’ın zimmetini ibrâ ve ıskāt eylediğimde ol dahi bedel-i sulh olan on beş guruşa müte‘allika da‘vâdan benim zimmetimi ibrâ ve ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin aşer min-Zilhicceti’ş-şerîfe sene 1137. Şuhûdü’l-hâl: İbrahim Çelebi b. Muharrem, Süleyman Efendi b. Osman, Halil Çelebi b. Mustafa, Mustafa b. Ahmed, Mehmed b. Ahmed, Ali Bey b. Abdullah.