Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 285 Hüküm no: 303 Orijinal metin no: [43b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tabib Martin’in mülk arsasını kızı Vitorya’ya meccânen hibe ettiği Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden mevlânâ Halil Efendi b. Hüseyin me’zûnen bi’l-ketb irsâl olunup ol dahi mahrûse-i Galata hâricinde vâki‘ Tomtom mahallesi sâkinlerinden Tabib Matin’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde sâbıkā Fransız elçisi olan Françesko Dölin v. Laferton nâm müste’men meclis-i ma‘kūd-ı mezbûrda tabîb-i merkūm Matin’in kebîre kızı işbu hâmiletü’r-rakīm Vitorya nâm Nasrâniye muvâcehesinde Fransız tercümânı Franko Fozti hâzır olduğu hâlde ikrâr ve takrîr-i kelâm edip akd-i âtî sudûruna değin silk-i mülkümde münselik olup mahrûse-i mezbûre hâricinde Kamer Hâtun mahallesinde sâkin Ketahorye nâm mahalde vâki‘ bir tarafdan ba‘zen Durmuş Beşe ve ba‘zen Belgradlı zimmî mülkleri ve bir tarafdan Yorgi zimmî mülkü ve bir tarafdan Seyflü nâm Nasrâniye mülkü ve bir tarafdan tarîk-i âm ile mahdûd fevkānî on bâb oda ve dehlîz ve tahtânî bir bâb oda ve bir matbah ve üç mahzen ve bir sahrınc ve kenîf ve bi’r-i mâ ve bir mikdâr havlu ve cevânib-i erba‘ası duvar ile eşcâr-ı müsmire ve gayr-i müsmire bahçe ve derûn-ı bahçede bir köşkü müştemil olup arsasının Sabuncuoğlu köşesinde vâki‘ tûlen otuz beş ve arzen üç buçuk bi-hesâb-ı terbî‘i yüz yirmi iki zirâ‘ı icâre-i mu‘accele ve ayda yirmi akçe icâre-i mü’eccele ile merhûm Hazînedârbaşı Ağa Vakfı’ndan olduğu hâlde tasarrufumda olup ve bâkī arsa ve ebniye-i mevcûdesi bi-cümletin mülküm olan menzil-i kebîr ile yine menzil-i mezbûra muttasıl tarafeynden menzil-i merkūm ve bir tarafdan Meyhaneci Anton mülkü ve bir tarafdan tarîk-i âm ile mahdûd iki aded sundurma ve bi’r-i mâ ve eşcârı müştemil mülk arsamı cemî‘ tevâbi‘ ve levâhıkları ve kâffeten menâfi‘ ve merâfıklarıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile bi-safkatin vâhidetin merkūme Vitorya’ya iki bin iki yüz guruşa bey‘ u temlîk ve teslîm ve arsa-i mevkūfe-i merkūmede olan hakk-ı tasarrufumu dahi bâ-izn-i mütevellî merkūme Vitorya’ya meccânen ferâğ ve tefvîz eylediğimde ol dahi ber-minvâl-i muharrer iştirâ ve temellük ve tesellüm ve tefevvüz ve kabûl eyledikden sonra semeni olan meblağ-ı mezbûr iki bin iki yüz guruşu merkūme Vitorya’nın mülk-i müşterâsı ve hakk-ı müfevvezi olmuşdur keyfemâ teşâ ve tahtâr mutasarrıfa olsun dedikde gıbbe’t-tasdîki’ş-şer‘î <>vâki‘ hâli mevlânâyı mezkûr mahallinde ketb ü tahrîr ve ma‘an ba‘s olunan Süleyman Beşe b. Abdullah ve Serbölük Halil Çelebi b. Mustafa ile mahfel-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis aşer min-Zilhicceti’ş-şerîfe sene 1137. Şuhûdü’l-hâl: el-Hâc Ahmed b. Ali, Süleyman Çelebi b. Ali, Mustafa Beşe b. Mehmed, Hüseyin Beşe b. Hasan, Hasan Beşe b. Abdullah.