Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 286 Hüküm no: 304 Orijinal metin no: [43b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vahide bt. Abdullah’ın menzilinin yarı hissesini kocası Abdullah b. Abdülkerim’e sattığı Mahrûse-i Galata a‘mâlinden kasaba-i Tophane’de Cihangir mahallesinde sâkine olup zâtı Ahmed Çelebi b. el-Hâc İbrahim ve Edhem Çelebi b. Abdullah ta‘rîfleriyle mu‘arrefe olan Vahide bt. Abdullah nâm hâtun meclis-i şer‘de zevci işbu râfi‘u’l-vesîka Abdullah b. Abdülkerîm mahzarında ikrâr ve takrîr-i kelâm edip akd-i âtî sudûruna değin yedimde mülküm olup mahalle-i merkūmede vâki‘ bir tarafdan Osman Çelebi mülkü ve bir tarafdan Molla Mahmud mülkü ve bir tarafdan tarîk-i hâs ile mahdûd fevkānî iki bâb oda ve bir sofa ve tahtânî bir bâb oda ve ahur ve kenîf ve bi’r-i mâ ve eşcâr-ı müsmire ve gayr-i müsmireli bahçeyi müştemil mülk menzilimin nısf-ı şâyi‘ini cemî‘ tevâbi‘ ve levâhıkı ve kâffe-i menâfi‘ ve merâfıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcim merkūm Abdullah’a yüz yirmi guruşa bey‘ u temlîk eylediğimde ol dahi ber-minvâl-i muharrer iştirâ [44a] ve tesellüm ve kabûl eyledikden sonra semeni olan mablağ-ı mezbûra müte‘allika âmme-i da‘vâdan zevcim mezbûr Abdullah’ın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim fîmâ ba‘d menzil-i mahdûd-ı mezbûrun nısf-ı şâyi‘i benim ve nısf-ı şâyi‘-ı âharı zevcim mezbûr Abdullah’ın mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ aşer min-Zilhicceti’ş-şerîfe sene 1137. Şuhûdü’l-hâl: Abdurrahman Çelebi b. Hüseyin, İbrahim Çelebi b. Abdullah, Mehmed Çelebi b. Mahmud, Ahmed Efendi b. Süleyman, Süleyman Efendi b. Osman, İbrahim Çelebi b. Mustafa huddâm, Mustafa b. Ahmed huddâm.