Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 800 Hüküm no: 1048 Orijinal metin no: [124b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Mehmed’in, Halil b. Murad’dan alacaklı olduğu Dârü’l-hilâfeti’l-aliyye Kostantıniyye el-mahmiyye mahallâtından Sofular mahallesi ahâlîsinden olup bi’l-fi‘l mahrûse-i Edirne dergâh-ı âlî -dâme merci‘an li’l-e‘âlî- yeniçeri[ler]inin ağaları olan umdetü’l-emâcid ve’l-ekârim Ahmed Ağa’nın kilerciliği hizmetinde olan Ali b. Mehmed’in li ebeveyn karındaşı ve tarafından husûs-ı âti’l-beyâna vekîli olduğu ağa-yı mûmâ-ileyhin çukadârı Mehmed b. Hüseyin ve kapıcıbaşı Hüseyin b. Abdullah nâm kimesneler şehâdetleriyle şer‘an sâbit olan Mustafa b. Hüseyin nâm kimesne dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i âlîde mahmiye-i merkūmede Müftü Ali Çelebi mahallesinde sâkin Halil b. Murad nâm kimesne mahzarında üzerine da‘vâ ve takrîr-i kelâm edip müvekkil-i mezbûrun merkūm Halil zimmetinde deyn-i şer‘îden kırk kıt‘a esedî guruş hakkı olmağın suâl olunup alıverilmesi matlûbumdur dedikde gıbbe’s-suâl merkūm Halil cevâbında fi’l-hakīka müdde‘î-i mezbûrun li ebeveyn karındaşı ve müvekkili merkūm Ali’ye deyn-i şer‘îden kırk kıt‘a esedî guruş deynim vardır deyû bi’t-tav‘ihî ikrâr etmeğin alâ mûcebi ikrârihî meblağ-ı mezkûr kırk kıt‘a esedî guruşu vekîl-i mezbûr Mustafa’ya edâya merkūm Halil’e ba‘de’t-tenbîh mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mahmud Efendi b. Pir, fahrü’l-eşbâh Şaban Ağa b. Süleyman Ser-muhzırân, fahrü’l-a‘yân Eyüb Ağa b. Ahmed, Hasan b. Abdullah.