Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 799 Hüküm no: 1047 Orijinal metin no: [124a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şerife Âişe’nin, evini el-Hâc Ali b. Mustafa’ya sattığı Medîne-i Ebî Eyyûb-i Ensârî -radiye anhu rabbühü’l-Bârî-’de Câmi‘-i Kebîr mahallesi sâkinelerinden Şerîfe Âişe bt. ( ) hâtunun zevci ve tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifûn Ahmed Beşe b. Mustafa ve Hacı Ahmed b. Mehmed ve Halil Beşe b. İbrahim nâm kimesneler şehâdetleriyle şer‘an sâbit olan Yusuf Ağa b. Abdülmennân nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de hâlâ bakkallar pazarbaşısı olan fahrü’l-eşbâh bâ‘is-i hâze’l-kitâb el-Hâc Ali b. Mustafa mahzarında ikrâr ve takrîr-i kelâm edip müvekkilem mezbûre Âişe Hâtun yedinde mülkü ve hakkı olup mahmiye-i İstanbul’da Nevbahar mahallesinde vâki‘ bir tarafdan Mustafa Efendi mülkü ve bir tarafdan Fethi Çavuş veresesi mülkleri ve bir tarafdan ba‘zen tarîk-i hâs ve ba‘zen Nevbahar mescidi ve bir tarafdan tarîk-i âm ile mahdûd dâhilen ve hâricen fevkānî ve tahtânî büyût-ı adîde ve kanavât ve müsennât ile muhrez mâ-i cârî ve kenîfi müştemil olup bundan akdem bey‘ bi’l-vefâ ile üç bin kıt‘a esedî guruşa mezbûr Hacı Ali’ye bey‘ ve teslîm ve kabz-ı semen ettiği menzilini mezbûr el-Hâc Ali’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile üç bin iki yüz esedî guruşa bey‘ ve teslîm edip ol dahi iştirâ ve tesellüm ettikden sonra semen-i mezbûrun üç bin esedî guruşunu mezbûr el-Hâc Ali’ye zimmetinde deyni olan üç bin esedî guruşa takās edip mezbûr el-Hâc Ali dahi mukāssa ettiğinden sonra semen-i mezbûrdan bâkī iki yüz elli esedî guruşu mezbûr Hacı Ali yedinden ahz u kabz eyledi, min ba‘d menzil-i mahdûd-ı mezbûr merkūm Hacı Ali’nin mülk-i müşterâsı ve hakk-ı sırfıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: El-Hâc Müstecab b. Ahmed, Mustafa b. Oruc, Ahmed b. Mustafa Ağa Kethüdâ-yı Mahalle-i Sultânî, Hacı Veli b. Hüseyin, Ahmed Bey b. Resul, Receb Bölükbaşı [b.] Ahmed, Şaban Beşe b. Ahmed, Hasan Beşe b. Mehmed, Bayram Beşe b. Mustafa, Şahbaz Ağa b. Abdullah, İsmail Efendi [b.] Mehmed, Osman Ağa b. Hüseyin, Ebûbekir Bey [b.] Ömer, Halil b. Şaban, Receb Çelebi b. ( ) el-Müezzin, Ali Bey b. Hasan, Musa [b.] Ali Beşe.