Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 801 Hüküm no: 1050 Orijinal metin no: [124b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Hasan ve Aydın’ın ölen amcaları Ali Dede b. Abdullah’ın terekesine el koyan beytülmâl emîninden hisselerini tahsil ettikleri Vilâyet-i Rumeli’nde Avlonya kazâsında tâbi‘ Esfer nâm karye ahâlîsinden Hacı Hasan ve Aydın ibney Mehmed nâm kimesneler dîvân-ı sa‘âdet-ünvânda ma‘kūd meclis-i şer‘-i hatîrde bundan akdem mahmiye-i İstanbul’da Topkapısı dâhilinde sâkin iken vefât eden Ali Dede b. Abdullah’ın zâhirde zevce-i metrûke-i menkûhasından gayrı vâris-i ma‘rûfu olmamak zu‘mu ile terekesinin selâse erbâ‘ına sâbıkan beytülmâl-i âmme emîni olup vâzı‘ü’l-yed olan bâ‘isü’l-kitâb Mehmed Ağa b. Mehmed mahzarında her biri ikrâr ve takrîr-i kelâm edip bundan akdem müteveffâ-yı mezbûr Ali Dede’nin li ebeveyn karındaşı oğlu olduğumuzu müteveffâ-yı mezbûrun zevce-i metrûkesi olan Temenna bt. Abdullah muvâcehesinde isbât edip verâsetimize hükm-i şer‘î lâhık olmuşidi el-hâletü hâzihî tereke-i müteveffâ-yı mezbûrdan bizim hissemize isâbet eden yedi bin akçeyi merkūm Mehmed Ağa ol târihde emîn olmağla bi’l-emâne kabz etmeğin hâlâ meblağ-ı merkūm yedi bin akçeyi merkūm Mehmed Ağa yedinden tamâmın ahz u kabz eyledik min ba‘d merkūm Mehmed Ağa’nın yedinde tereke-i müteveffâ-yı merkūmdan bir akçe ve bir habbemiz kalmadı dediklerinde gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Umdetü’l-emâcid ve’l-ekârim Çavuşbaşı İsmail Ağa, umdetü erbâbi’t-tahrîr ve’l-kalem Ebûbekir Efendi, umdetü erbâbi’t-tahrîr ve’r-rakam Mustafa Efendi, Eyüb Ağa.