Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 312 Hüküm no: 341 Orijinal metin no: [49a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hristodori v. Papa Panayot’un ortaklarına olan borçlarına karşılık mülk menziliyle mülk bağını ve hayvanlarını bir seneliğine rehin verdiği Mahmiye-i İstanbul’da Yedikule kurbünde vâki‘ Mirahur mahallesinde sâkin kasâb tâifesinden Hristodori v. Papa Panayot nâm zimmi mahfil-i şer‘de Flemenk tüccârlarından olup gıyâben şerîkler olan işbu hâmilü’r-rakīm Dimperok v. Arnoldo ve Romboz v. Antoli nâm müste’menler muvâcehelerinde Flemenk tercümânlarından Covani v. Golamotlos hâzır olduğu hâlde ikrâr ve takrîr-i kelâm edip benim müste’menân-ı merkūmân Dimperok ve Romboz’a mukaddemâ yedlerinden iştirâ ve kabz eylediğim ecnâs ve zirâ‘ları beynimizde ilm-i şer‘î ile ma‘lûm olan elvân çuka semeninden bin dört guruş on beş akçe ve hâlâ yedlerinden iştirâ ve kabz eylediğim evsâf ve zirâ‘ları kezâlik beynimizde ilm-i şer‘î ile ma‘lûm on iki pastav Flemenk başı ma‘hûrî elvân çuka ve yirmi dört pastav Fransız çukası ve her destesi on ikişer üzere yetmiş dört deste Flemenk tavşanı kürk ve bir elmas yüzük ve bir la‘l yüzük semenlerinden dahi üç bin üç yüz doksan beş guruş yüz beş akçe ki min-haysü’l-mecmû‘ müste’menân-ı merkūmâna zimmetimde edâsı lâzım dört bin dört yüz guruş deynim olmağın ben dahi silk-i mülkümde münselik olup Havâss-ı Refi‘a kazâsına tâbi‘ Çekmece-i sagīr nâhiyesi mülhakātından Menekşe nâm karye[de] vâki‘ iki tarafdan Musa Ağa mülkü ve tarafeynden tarîk-i âm ile mahdûd dâhiliyede fevkānî iki bâb oda ve bir sofa ve kenîf ve tahtında matbah ve ahur ve çatma anbar ve bağ ve eşcârlı bahçe ve bir mikdâr havlu ve hâriciyede bir bâb tahtânî oda ve bir anbar ve ahur ve samanhâne ve havluyu müştemil çiftlik ta‘bîr olunur mülk menzilim ile yine karye-i merkūmede vâki‘ etrâf-ı erba‘ası tarîk-i âmma müntehî iki bâb fevkānî oda ve iki bâb tahtânî oda ve bir matbah ve ahur ve bir fırın ve samanhâne ve fevkānî odaları müştemil çiftlik ta‘bîr olunur âhar mülk menzilimi ve yine karye-i merkūmede vâki‘ ma‘lûmü’l-hudûd tahmînen iki dönüm bir kıt‘a bağ ve lede’l-ahâlî ve’l-cîrân ma‘lûmü’l-hudûd bir bâb bostânî odası ve bir havuzu müştemil mülk bostanımı ve yine karye-i merkūmede vâki‘ etrâf-ı erba‘ası tarîk-i âm ile mahdûd [49b] dâhiliyede üç kat bir mükemmel kule ve iki bâb fevkānî oda ve iki sofa ve tahtında bir bâb oda ve bir ahur ve bir sundurma ahur ve eşcâr-ı müsmire ve gayr-i müsmireli bahçe ve hâricinde iki bâb fevkānî oda ve tahtında ahur ve fırın ve samanhâne ve havluyu müştemil çiftlik ta‘bîr olunur mülk menzilimi ve yine karye-i merkūmede vâki‘ lede’l-ahâlî ve’l-cîrân ma‘lumü’l-hudûd çiftlik ta‘bîr olunur kürûmu mülk bağımı ve zikr olunan çiftlikler derûnunda mevcûd bir çift manda ve dört çift kara sığır ve üç re’s inek ve dört re’s buzağı ve üç re’s bârgîr ve dört aded kovanlarımı bi-cümletihi’t-tevâbi‘ ve’l-levâhık ve kâffeti’l-menâfi‘ ve’l-merâfık semeni târih-i kitâbdan bir sene tamâmına değin mü’eccel ve mev‘ûd olmak üzere bi-safkatin vâhidetin müste’menân-ı merkūmân Dimperok ve Romboz’a bey‘-i bi’l-vefâ tarîkiyle dört bin dört yüz guruşa iştirâken bey‘ eylediğimde onlar dahi ber-minvâl-i muharrer iştirâ ve kabûl eylediklerinden sonra semen-i merkūm dört bin dört yüz guruşu bâlâda zikr olunduğu üzere cihet-i mezbûreden müste’menân-ı merkūmâna cem‘an zimmetimde deynim olan dört bin dört yüz guruşa isre’t-takās ve’l-mukāssa ve’l-kabûl emlâk-ı merkūmeyi mahallerinde zabt ve hıfza müste’menân-ı merkūmânı taslît eyledim dedikde gıbbe’t-tasdîki’ş-şer‘î merkūm Hristodori yine meclis-i mezkûrda i‘âde-i kelâm edip bey‘-i mezbûrda hakīkatde rehn olmağla benim için müddet-i madrûbe tamâmına değin meblağ-ı mezbûr dört bin dört yüz guruşu müste’menân-ı merkūmâna edâ ve emlâk-ı mezbûreyi rehniyyetden fekk ve tahlîs mümkün olmazsa emlâk-ı mahdûde-i merkūmeyi semen-i misilleriyle âhara bey‘ ve semenlerini ahz u kabza ve semen-i mezbûrdan deyn-i mezbûru müste’menân-ı merkūmân Dimperok ve Romboz’a edâ ve teslîme ve fazla kalırsa fazlasını bana edâya ve noksân zuhûr ederse noksânını yine ben mâlımdan tekmîl etmek üzere tarafımdan işbu hâzır bi’l-meclis Ali Ağa b. Hasan’ı küllemâ aziltüke fe-ente vekîlî mazmûnu üzere vekâlet-i devriye-i şer‘iyye ile vekîl ve nâib-i menâb nasb ve ta‘yîn eyledim dedikde mezbûr Ali Ağa dahi ber-vech-i muharrer vekâlet-i mezbûreyi kabûl ve hizmet-i lâzimesini mahallinde ikāmete ta‘ahhüd eyledikden sonra Karakaş İsak v. Yasef nâm Yahûdi meblağ-ı mü’eccel-i merkūm dört bin dört yüz guruşa bi’l-emr ve’l-kabûl kefâlet-i sahîha ile kefîl ve dāmin olmağın mâ-hüve’l-vâkı‘ bi’l-ibtigā ketb olundu. Fi’l-yevmi’l-âşir min-Muharremi’l-harâm sene 1138. Şuhûdü’l-hâl: Arusi Mustafa Efendi b. Hasan, Yahya Efendi b. Yusuf Efendi, Süleyman Efendi b. Osman, Attar Hüseyin Çelebi b. Abdullah, Serbölük İbrahim Çelebi, Serbölük Halil Çelebi.