Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 314 Hüküm no: 342 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi b. Mehmed’in dükkan hissesini sattığı Veli Beşe b. Mustafa’dan alacaklarını tahsil ettiği El-emru hasbemâ yahvîhi nemakahu’l-fakīr ileyhi azze şânuhû el-Hâc Mustafa el-Kādî bi-medîneti Galata -afâ anhu-. Mahrûse-i Galata’da Câmi‘-i Kebîr mahallesi ahâlîsinden Ahmed Çelebi b. Mehmed nâm kimesne meclis-i şer‘de işbu râfi‘u’l-kitâb Veli Beşe b. Mustafa nâm kimesne mahzarında zikri âtî vakfın mütevelliyesi vekîli İbrahim Ağa hâzır olduğu hâlde ikrâr ve takrîr-i kelâm edip merhûm Solak Mustafa Ağa Vakfı’ndan olup mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd vakıf menzil karındaşım gāib ani’l-meclis el-Hâc İbrahim ile iştirâken taht-ı tasarrufumuzda olup ve menzil-i mezbûrun tahtında olan dükkânın nısfı benim tasarrufumda olmağla karındaşım gāib-i mezbûr ile menzil-i mezbûr ve nısf dükkânı bundan akdem ma‘rifet-i mütevellî ile üç yüz seksen guruş bedel mukābelesinde mezbûr Veli Beşe’ye ferâğ ve tefvîz edip ve bedel-i mezbûrun iki yüz elli üç guruş bir zolatası bana isâbet etmeğle bedel-i mezbûrun yüz guruşunu mezbûr Veli Beşe yedinden ahz u kabz eyleyip yüz elli üç guruş bir zolata zimmetinde bâkī kalmış idi deyü mezbûr Veli Beşe’den da‘vâya tasaddî eylemiş idim el-hâletü hâzihî beynimize muslihûn tavassut edip da‘vâ-yı mezkûremden mezbûr Veli Beşe ile beni seksen guruş üzerine inşâ-i akd-i sulh eylediklerinde ben dahi ber-vech-i muharrer sulh-ı mezbûru kabûl ve bedel-i sulh olan mablağ-ı mezbûr seksen guruşu mezbûr Veli Beşe yedinden tamâmen ahz u kabz eylediğimden sonra mâ‘adâsı olan yetmiş üç guruş bir zolataya <> ve zikr olunan menzil ve dükkâna ve bedeline ve bedel-i sulh-i mezbûra ve târih-i kitâba gelince beynimizde cereyân eden sâir husûsa müte‘allika âmme-i da‘vâdan tarafeynden her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ hüve’l-vâki bi’l-ibtigā ketb olundu. Fi’l-yevmi’l-hâmis aşer min-Muharremi’l-harâm sene 1138. Şuhûdü’l-hâl: Hüseyin Efendi b. Hasan Efendi, es-Seyyid Ali Ağa b. Hasan, Mehmed Çelebi b. Ali, Halil Ağa b. İbrahim, es-Seyyid Mustafa b. Mehmed, Mehmed Çelebi b. Halil, İbrahim Çelebi b. Hasan, Mehmed Ağa b. İbrahim, es-Seyyid Hasan Çelebi b. Veli, İsmail Çelebi b. Ali, Ali Beşe b. Mustafa, Abdüllatif b. Ali, Osman Çavuş b. Ali.