Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 326 Hüküm no: 357 Orijinal metin no: [52a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife bt. Ali’nin Fatıma bt. Abdülmennan ve Ümmügülsüm bt. Osman ile alacak davasında sulh oldukları Mahrûse-i Galata’da Şehsuvar mahallesinde sâkine Hanife bt. Ali nâm hâtun zâtı ba‘de’t-ta‘rîfi’ş-şer‘î meclis-i şer‘de mahrûse-i mezbûre hâricinde Defterdar Ebulfazl mahallesinde sâkine Fâtıma bt. Abdülmennân b. Abdullah nâm ve Ümmügülsüm bt. Osman b. Abdülkerîm nâm hâtunlar taraflarından zikri câî sulh ve ibrâyı tasdîka vekîlleri olduğu mezbûretânın zâtlarını ma‘rifet-i şer‘iyye ile ârifân es-Seyyid Halil Ağa b. Veli ve İsmail Çelebi b. Mustafa nâm kimesneler şehâdetleriyle sâbit olmağla işbu râfi‘u’r-rakīm es-Seyyid Abdullah Çelebi b. es-Seyyid Taha nâm kimesne mahzarında ikrâr ve takrîr-i kelâm edip müvekkiletân-ı mezbûretân Fâtıma ve Ümmügülsüm zimmetlerinde bundan akdem yedimden iştirâ ve kabz eyledikleri cinsi beynimizde ma‘lûm eşyâ semeninden otuz guruş hakkım olup meblağ-ı mezbûr mukābelesinde eşyâ-i memlûkelerinden bir başak yemenî ve bir sincâbî cübbe ve bir örenşâhî? entâri ve bir turuncu çuka düğme bana rehin ve teslîm eylemiş idi ben meblağ-ı mezbûr otuz guruşu müvekkiletân-ı mezbûretân Fâtıma ve Ümmügülsüm’den taleb eylediğimde onlar dahi rehâin-ı mezkûreden mâ‘adâ benden bir inci kuşak ve bir çift inci küpe da‘vâ etmeleriyle beynimizde münâza‘ât-ı kesîre cereyân etmiş idi el-hâletü hâzihî beynimizde muslihûn tavassut edip beni da‘vâ-yı mezkûremden müvekkiletân-ı merkūmetân ile on iki guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûru müvekkiletân-ı merkūmetân yedlerinden tamâmen ahz u kabz eylediğimden sonra mâ‘adâsı olan on sekiz guruşa müte‘allika âmme-i da‘vâdan ben müvekkiletân-ı mezbûretân Fâtıma ve Ümmügülsüm’ün zimmetlerini ibrâ-i âmm-ı kātı‘u’n-nizâ‘la ibrâ ve ıskāt edip < > onlar dahi rehâin-ı mezkûrelerini yedimden ba‘de’l-ahz iddi‘â eyledikleri sâbiku’z-zikr inci kuşak ve küpeye ve bedel-i sulh-i mezbûra müte‘allika âmme-i da‘vâdan kezâlik benim zimmetimi ibrâ ve ıskāt eyledin dedikde vekîl-i mezbûr es-Seyyid Abdullah Çelebi dahi mukırra-i mezbûre Hanife Hâtun’u ikrâr-ı meşrûhasında vicâhen tahkīk ve şifâhen tasdîk etmeğin mâ-vaka‘a bi’l-ibtigā ketb olundu. Fi’l-yevmi’s-sâdis aşer min-Muharremi’l-harâm sene 1138. Şuhûdü’l-hâl: İbrahim Çelebi b. Muharrem, Halil Çelebi b. Mustafa, Mustafa b. Ahmed, Mustafa b. Receb, İbrahim b. Mustafa, Mehmed b. Ahmed.