Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 325 Hüküm no: 356 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ohan v. Mihail’in Kirkor v. Bedros’dan alacağına karşılık sulh oldukları <> <> Vilâyet-i Anadolu’da Sivas kasabasında sâkin iken bundan akdem hâlik olan Ohan v. Mihail v. Asvador nâm Ermeninin veraseti li-ebeveyn er karındaşları ve hasren vârisleri Azar ve Onan nâm Ermenilere inhisârı tahakkukundan sonra merkūm Azar kendi tarafından asâleten ve karındaşı merkūm Onan tarafından zikirleri câî sulh ve ibrâya vekîl olduğu Yani v. Bogos ve Munok v. David nâm Ermeniler şehâdetleriyle mahzar-ı hasm-ı câhidde şer‘an sâbit ve vekâletine hükm-i şer‘î lâhik olmağla vekâleten mahfil-i şer‘de işbu hâmilü’r-rakīm Kirkor v. Bedros nâm Ermeni muvâcehesinde bi’l-asâle ve bi’l-vekâle ikrâr ve takrîr-i kelâm edip karındaşım hâlik-i merkūm Ohan’ın mersûm Kirkor zimmetinde cihet-i karz-ı şer‘îden yüz sagīr altun hakkı olup kable’l-ahz helâkı hasebiyle meblağ-ı mezbûr benimle karındaşım müvekkil-i merkūm Onan’a mevrûse olmuşdur deyü merkūm Kirkor’dan da‘vâ eylediğimde ol dahi inkâr etmeğle beynimizde münâza‘ât-ı kesîre cereyân etmiş idi el-hâletü hâzihî beynimize muslihûn tavassut edip beni da‘vâ-yı mezkûremden merkūm Kirkor ile an inkâr fedâen li’l-yemîn altı sagīr altun üzerine inşâ-i akd-i sulh eylediklerinde ben dahi bi’l-asâle ve bi’l-vekâle sulh-i merkūmu kabûl ve bedel-i sulh-i mezbûru merkūm Kirkor yedinde tamâmen ahz u kabz eylediğimden sonra meblağ-ı bâkī doksan dört altuna ve mukaddemâ kendüden da‘vâ ve on guruşa sulh olduğum kırk guruşa ve târih-i vesîkaya gelince beynimizde cereyân eden ahz u i‘tâya müte‘allika âmme-i da‘vâdan bi’l-asâle ve bi’l-vekâle merkūm Kirkor’un zimmetini ibrâ ve ıskāt eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ aşer min-Muharremi’l-harâm sene 1138. Şuhûdü’l-hâl: Mustafa Efendi b. Mehmed, Ahmed Efendi b. Süleyman, Süleyman Efendi b. Osman, Mukayyid İbrahim Efendi, İbrahim b. Muharrem, Halil Çelebi b. Mustafa.