Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 328 Hüküm no: 359 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah’ın kocası Ömer Hoca b. Yusuf’un Süleyman b. Gazi tarafından kasten öldürüldüğü Mahmiye-i İstanbul’da Ayazmakapısı dâhilinde vâki‘ Hoca Hayreddin mahallesinde sâkin iken katîlen vefât eden Ömer Hoca b. Yusuf b. Maden nâm kimesnenin verâseti zevce-i metrûkesi Âişe bt. Abdullah nâm hâtun ile sulbî sagīr oğlu İbrahim’e münhasıra olduğu lede’ş-şer‘i’l-enver zâhir ve mukarrer oldukdan sonra işbu râfi‘atü’l-vesîka mezbûre Âişe Hâtun meclis-i şer‘-i şerîf-i nebevîde Mısırlı tâifesinden Süleyman b. Gazi nâm kimesne mahzarında üzerine da‘vâ ve takrîr-i kelâm edip mezbûr Süleyman târih-i kitâbdan yedi gün mukaddem mahrûse-i Galata hısnı ebvâbından Balıkpazarı kapısı dâhilinde vâki‘ sûkda ba‘de’l-asr âlet-i cârihadan bir siyah kabzalı kebîr bıçak ile zevcim katîl-i mezbûr Ömer Hoca’nın amden bi-gayrı hakkın sol memesi üzerinden ve sol kolunun pazusundan ve oynak yerinden darb ve cerh ve katl etmeğin el-ân mezbûr Süleyman’dan suâl olunup cinâyet-i mezbûresinin mûcib-i şer‘îsi icrâ olunmak matlûbumdur dedikde gıbbe’s-suâl ve akībe’l-inkâr ve isre’l-istişhâd-i talebi’l-beyyine udûl-i Müslimînden olup mahrûse-i mezbûrede vâki‘ kürkcü esnâfından İbrahim Beşe b. Mustafa ve zikr olunan Hoca Hayreddin mahallesinde kazancı tâifesinden Hasan Beşe b. Mehmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ işbu mezbûr Süleyman târih-i kitâbdan yedi gün mukaddem zikr olunan Balıkpazarı kapısı dâhilinde vâki‘ sûkda ba‘de’l-asr âlet-i cârihadan bir siyah kabzalı kebîr bıçak ile mezbûre Âişe’nin zevci katîl-i mezbûr Ömer Hoca b. Yusuf b. Maden’in bizim huzûrumuzda amden bi-gayrı hakkın sol memesi üzerinden ve sol kolunun pazusundan ve oynak yerinden darb ve cerh ve katl eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde şâhidân-ı mezbûrânın keyfiyet-i ahvâlleri mahalleleri ahâlîsinden isimleri müseccel yirmi nefer bî-garaz Müslimînden tefahhus ve suâl olundukda adiller ve makbûlü’ş-şehâde oldukları ihbâr olunmağla mezbûrân İbrahim Beşe ve Hasan Beşe’nin şehâdetleri hayyiz-i kabûlde vâkı‘a olmağın mûcebiyle ba‘de’l-hükm mâ-vaka‘a bi’l-ibtigā ketb olundu. Fi’l-yevmi’l-hâdî ve’l-ışrîn min-Muharremi’l-harâm sene 1138. Şuhûdü’l-hâl: Mustafa Efendi b. Hasan, Süleyman Efendi b. Osman, Ahmed Efendi b. Süleyman, İbrahim Çelebi b. Muharrem, Halil Çelebi b. Mustafa, Mustafa b. Ahmed, Ahmed b. Mustafa, <<İbrahim b. Mustafa>> Mehmed b. Ahmed, Sarrac Hasan Beşe b. Abdullah, Yusuf b. Abdullah, Çukadâr el-Hâc Mehmed ve gayrühum.