Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 329 Hüküm no: 360 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Ali b. el-Hâc Musa’nın menzilini Müezzin Ahmed Çelebi b. Sinan’a sattığı Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden mevlânâ Ahmed Efendi b. eş-Şeyh Süleyman irsâl olunup ol dahi mahrûse-i Galata a‘mâlinden kasaba-i Fındıklı’da Pürtelaş Hasan mahallesinde sâkin Müezzin Ahmed Çelebi b. Sinan nâm kimesnenin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf-i nebevî eyledikde yine mezbûr Ahmed Çelebi’nin menzilinde sâkine ve zâtı Keresteci el-Hâc Abdullah b. Ali ve Duhânî Ali Ağa b. Abdurrahman nâm kimesneler ta‘rîfleriyle mu‘arrefe olan Rukiye bt. Ali b. el-Hâc Musa nâm hâtun meclis-i ma‘kūd-ı mezbûrda li-ebeveyn kız karındaşı oğlu işbu râfi‘u’l-kitâb mezbûr Müezzin Ahmed Çelebi mahzarında bi-tav‘ihâ ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup kasaba-i mezbûrede Selime Hâtun mahallesinde vâki‘ bir tarafdan Âişe Hâtun menzili ve bir tarafdan ba‘zen Çukadâr Mehmed Çelebi ve ba‘zen mezbûr Âişe Hâtun menzilleri ve bir tarafdan tarîk-i âm ile mahdûd ulyâda iki bâb oda ve dehlîz vüstâda bir bâb oda ve dehlîz süflada bir mahtab ve bi’r-i mâ ve kenîf ve bir mikdâr eşcâr-ı müsmire ve gayr-i müsmireli bahçeyi müştemil mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü ve şurût-ı müfsideden ârî bey‘-i bâtt-ı sahîh-i şer‘î ile mezbûr Ahmed Çelebi’ye iki yüz elli guruşa bey‘ u temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra menzil-i mahdûd-ı mezbûrun aynına ve gabn ve tağrîrine ve semeni olan meblağ-ı mezbûr iki yüz elli guruşa müte‘allika âmme-i da‘vâdan mezbûr Ahmed Çelebi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm menzil-i mahdûd-ı mezkûr bi-cemî‘i mâ yeştemilühû ve yahvîhi mezbûr Ahmed Çelebi’nin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîk <>vâki‘ hâli mevlânâ-yı mezkûr mahallinde ketb ü tahrîr ve ma‘an ba‘s olunan Çukadâr Süleyman Bey b. Abdülkerîm ve Muhzır Mustafa Çelebi b. Ahmed ile mahfel-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ ve’l-ışrîn min-Muharremi’l-harâm sene 1138. Şuhûdü’l-hâl: Kolancı el-Hâc Ahmed b. İbrahim, Manav es-Seyyid Ahmed Çelebi, İplikci Yusuf Çelebi, Keresteci Ali Çelebi, Revgan Hacı Ali Çelebi, İmâm vekîli el-Hâc Mehmed, İmâm Mahmud Efendi, Kahveci Mehmed Çelebi, Molla Ahmed b. Mustafa, Cizyedar Ali Ağa, Müezzinzâde Mustafa Çelebi, Kayıkcı Halil Beşe, Molla Osman b. Hasan, Molla Osman b. Osman.