Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 71 Hüküm no: 38 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat etmiş olan el-Hâc Mehmed’den kızı Zemzem’e kalan malların idaresi için kocası el-Hâc Ahmed’in vekil tayin edilmiş olduğu Bender-i Reşid ahâlîsinden olup bundan akdem müteveffâ olan el-Hâc Mehmed b. el-Hâc Salim’in verâseti sulbiye kebîre kızı Zemzem nâm hatuna münhasıra olduğu müte‘ayyin oldukdan sonra mezbûrenin zevci ve da‘vâ ...? ve sâir husûsa vekîl-i mutlakı olan el-Hâc Ahmed b. Şemseddin mahfil-i şer‘-i şerîfde tüccâr tâifesinden Mansur b. Nureddin nâm kimesne mahzarında üzerine bi’l-vekâle da‘vâ edip müvekkile-i mezbûrenin babası ve mûrisi müteveffâ-i mezbûr hâl-i hayâtında mezbûr Mansur’un tasarrufunda olan emlâki icâra ve hâsıl olan ücreti kabza ve zimem-i nâsda olan hukūkumu dahi kabz ve îsâle tevkîl eyleyip mezbûr Mansur dahi vekâlet-i mezbûreyi kabûl ve zimem-i nâsda olan hukūkunu ve emlâkin icâresini cem‘ edip mezbûr el-Hâc Mehmed müteveffâ olmağla kızı mezbûre Zemzem Hatun’a intikāl etmeğin vekâletim hasebiyle taleb eylediğimde vermede ta‘allül eder, suâl olunup makbûzu olan meblağın edâsına tenbîh olunmak murâdımdır dedikde gıbbe’l-istintak mezbûr Mansur, fi’l-hakīka müteveffâ-i mezbûr hâl-i sıhhatinde vech-i muharrer üzere emlâkini icâra ve sâir nâsda zimem olan hukūkunu dahi cem‘ ve tahsîle beni tevkîl edip ben dahi yedimde olan defter nâtık olduğu üzere zimemden ve icâreden bir mikdâr meblağ cem‘ ve tahsîl eylemişdim. Lâkin müteveffâ-i mezbûrun kızı ve vârisesi olan mezbûre Zemzem zevci mezbûr el-Hâc Ahmed’i tevkîl eylediği ma‘lûmum değildir deyü mezbûr el-Hâc Ahmed’i mezbûre Zemzem vekîl eylediğini münkir olmağın gıbbe’l-istişhâd udûl ve sikātdan el-Hâc İbrahim b. Yusuf ve el-Hâc Mehmed b. Ramazan hâzırân bi’l-meclis olup fi’l-hakīka mezbûre Zemzem bizim huzûrumuzda zevci mezbûr el-Hâc Ahmed’i mezbûr Mansur yedinde olup bi-hasebi’l-irs kendüye intikāl eden ve kezâlik sâir kimesne zimmetlerinde olup kendüye intikāl eden hukūkunu ahz u kabz ve îsâle tevkîl edip ol dahi vekâlet-i mezbûreyi kabûl ve hizmet-i lâzımesin edâya müte‘ahhid oldu, bu husûsa şâhidleriz, şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de ri‘âyeti şerâyiti’l-kabûl şehâdetleri hayyiz-i kabûle vusûl bulmağın mûcebiyle hüküm-birle mâ-vaka‘a bi’t-taleb ketb olundu. Fi’l-yevmi’l-hâmis min-Şa‘bâni’l-mübârek li-sene selâse ve sittin ve elf. Şuhûdü’l-hâl: Mehmed Efendi b. Abdüssettâr, el-Hâc Hâtır b. el-Hâc Ali, el-Hâc Mansur b. el-Hâc Yusuf, el-Hâc Cemaleddin b. Mer‘î, Mehmed Efendi b. İzzeddin el-Kādı, Şemseddin b. Ahmed ve gayruhum mine’l-huzzâr.