Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 72 Hüküm no: 39 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed Bey’in köle satışı ile alakalı Emine bt. Abdullah’ın zimmetini ibra ettiği Mahmiye-i İstanbul’da merhûme Vâlide Sultan Hanı’nda sâkin Hacı Mehmed Bey b. Ahmed nâm bevvâb-ı sultânî meclis-i şer‘-i hatîrde sâhibetü’l-kitâb Emine bt. Abdullah nâm hatun mahzarında ikrâr-ı tâm ve takrîr-i kelâm edip silk-i mülkümde münselik yedimde mülk ve hakkım olan açık kaşlı, kara gözlü, orta boylu, Nübiyyü’l-asl Beşir nâm Arap gulâmımı işbu Emine’ye bey‘-i sahîh ile yüz altmış riyâlî guruşa bâtten bey‘ ve teslîm edip ol dahi iştirâ ve tesellüm eyledikden mâ‘adâ işbu Emine târîh-i kitâbdan altı ay mukaddem gāib ani’l-meclis Osman Ağa b. Hasan yedinden iştirâ ve kabz eylediği Hırvatiyyü’l-asl Müslimetü’l-millet Belkıs nâm câriye semeninden mezbûr Osman Ağa’ya deyni olan yüz yirmi riyâlî guruşa ben emr ve kabûlü hâvîye kefâlet-i sahîha ile kefîl olmağla mezbûr Osman Ağa bi-hükmi’l-kefâlet meblağ-ı mezbûr yüz yirmi riyâlî guruşu mukaddemâ benden kefâletim hasebiyle ahz u kabz etmekle işbu Emine’den emri ile kefâleten edâ eylediğim yüz yirmi riyâlî guruş ve câriye semeni olan yüz altmış riyâlî guruş ki cem‘an iki yüz seksen riyâlî guruş hakkımı taleb ve da‘vâ eylediğimde beynimizde münâza‘ât-ı kesîre ve muhâsamât-ı ekîde vâkı‘a olmuş idi. El-hâletü hâzihî vesâtet-i Müslimîn ile seksen guruş üzerine sulh olup bedel-i sulh olan seksen guruşu mezbûr Emine yedinden ahz u kabz edip iki yüz guruşdan zimmetini ibrâ ve ıskāt eyledim, ba‘de’l-yevm mezbûre Emine’den ve kefîli olan mahmiye-i mezbûrede Dâye Hatun Mahallesi’nde sâkine Ümmühani bt. Beşir nâm hatundan husûs-ı mezbûra müte‘allika da‘vâm kalmamışdır, da‘vâ dahi edersem lede’l-hükkâmi’l-zevi’l-ihtirâm istimâ‘ ve ısgā olunmaya dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Şa‘bâni’l-mübârek li-sene selâse ve sittin ve elf. Şuhûdü’l-hâl: Es-Seyyid Mehmed Efendi b. es-Seyyid Ali, Ali Bey b. Receb, Mehmed Beşe b. Süleyman, Mahmud Beşe b. Süleyman, Hasan Çelebi er-Ressâm, Mehmed Beşe Çukadâr, İbrahim Çelebi b. Davud, Berber Beşe b. ( ) ressâm-ı sâbık, Rıdvan Beşe b. Abdullah.