Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 339 Hüküm no: 375 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi b. el-Hâc Mehmed’in alacak davasında Atami v. Canto ve Panayot v. Nikola ile sulh oldukları Mahrûse-i Galata’da el-Hâc A‘mâ mahallesinde sâkin Ali Çelebi b. el-Hâc Mehmed nâm kimesne meclis-i şer‘de işbu hâmilü’r-rakīm Atami v. Canto ve Panayot v. Nikola nâm zimmîler muvâcehelerinde ikrâr ve takrîr-i kelâm edip hâlâ merkūm Atami’nin mülkü olup İstinye nâhiyesine tâbi‘ Yeniköy nâm karyede vâki‘ habbâz fırını derûnunda elli panakot ve bir tekne ve gāretî dört anbar ve iki su fıçısı ve iki terazi ve bir buçuk vakiyye tuc dirhemleri ve dört kürek ve iki kandil ve bir piştahta ve iki yüz demet çalı fırın-ı mezbûrun mukaddemâ müste’ciri olan gāib ani’l-meclis Kiryako v. Dimo v. Kosta nâm zimmînin mülkü olup târih-i kitâbdan bir sene mukaddem gāib-i merkūm Kiryako’dan yüz elli guruşa iştirâ eylediğimi merkūm Atami ile hâlâ fırın-ı merkūmun müste’ciri olan mersûm Panayot muvâcehelerinde savb-ı şer‘den irsâl olunan Ahmed Efendi b. Süleyman huzûrunda Kethüdâ Salih Çelebi b. İslam ve Yiğitbaşı el-Hâc İbrahim b. Ahmed nâm kimesneler şehâdetleriyle vech-i şer‘î üzere isbât etmiş idim el-hâletü hâzihî beynimize muslihûn tavassut edip beni da‘vâ-yı mezkûremden merkūmân Atami ve Panayot ile yirmi iki buçuk guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr yirmi iki buçuk guruşu merkūmân Atami ve Panayot yedlerinden tamâmen ahz u kabz eylediğimden sonra eşyâ-yı mezkûreye ve bedel-i sulh-i mezbûra müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ min-Muharremi’l-harâm sene 1138. Şuhûdü’l-hâl: el-Hâc Mehmed b. Ali, Veli Çavuş el-mübâşir, Berber Mustafa Çelebi, Galatalı Mehmed Çelebi, Kavaklı İbrahim Ağa, Münadi Ahmed Çelebi, Halil Çelebi b. Mustafa, İbrahim b. Muharrem.