Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 339 Hüküm no: 374 Orijinal metin no: [54b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mahmud’un İbrahim Çelebi b. el-Hâc Ahmed’den muhalaa ile boşandığı Mahrûse-i Galata‘da Alacamescid mahallesinde sâkine olup zâtı Mehmed Çelebi b. Mehmed ve diğer Mehmed Çelebi b. Mahmud nâm kimesneler ta‘rîfleriyle mu‘arrefe olan Emine bt. Mahmud nâm hâtun meclis-i şer‘de zevc-i muhâlı‘ı işbu râfi‘u’l-vesîka İbrahim Çelebi b. el-Hâc Ahmed nâm kimesne mahzarında ikrâr ve takrîr-i kelâm edip zevcim mezbûr İbrahim Çelebi ile beynimizde adem-i hüsn-i zindegânîden nâşî ben hul‘a tâlibe ve râgıbe olduğum ecilden zimmetinde mütekarrır ve ma‘kūdün-aleyh olan üç bin akçe mehr-i mü’eccelimden geçip nafaka-i iddet ve me’ûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyyete ve târih-i kitâba gelince sâir beynimizde cereyân eden ahz u i‘tâya müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mezbûr Mehmed Çelebi b. Mahmud meclis-i mezbûrda merkūm İbrahim Çelebi muvâcehesinde ikrâr ve takrîr-i kelâm edip mezbûr İbrahim Çelebi ile beynimizde ba‘zı ahz u i‘tâ olmağla hesâbımızı rü’yet eylediğimizde birbirimizde bir nesne bâkī kalmayıp târih-i kitâba gelince âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ ve’l-ışrîn min-Muharremi’l-harâm sene 1138. Şuhûdü’l-hâl: Kapukethudâsı Mehmed Beşe b. Mustafa, Ali Beşe b. Mehmed, Ahmed Reis b. Abdüsselam, Deli İbrahim b. Mustafa, Halil Çelebi b. Mustafa, Sırmakeş Mustafa.