Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 341 Hüküm no: 377 Orijinal metin no: [55a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bezzaz Kazazros v. Kirkor’un vârislerinden Persaye’nin, babasının bezzaz dükkânından ortağı Anton v. Kirkor’dan kendi hissesine düşen meblağı tahsil ettiği Zikri âtî husûsun mahallinde ketb ü tahrîriʼçün savb-ı şer‘den irsâl olunan Yahya Efendi mahrûse-i Galata’da Sultân Bayezid mahallesinde sâkin iken târih-i kitâbdan on dört ay mukaddem hâlik olan Bezzâz Ferazros v. Kirkor ve Arakil nâm Ermeninin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf eyledikde hâlik-i mezbûrun verâseti zevce-i metrûkesi Derohi bt. Karabet nâm Ermeniye ve sulbî sagīr oğulları Bedros ve Komda’ye ve sulbiye kebîre kızı Persaye nâm Nasrâniyeye münhasıra ve tashîh-i meselesi bi-hükmi’l-ferâiz kırk sehimden mu‘teber olup sihâm-ı mezbûreden beş sehmi mezbûre Derohi’ye ve on dörder sehmi mezbûrân Bedros ve Komda’dan her birine ve yedi sehmi mezbûre Persaye’ye isâbeti tahakkukundan sonra şahsı zevci Abram v. Karabet ve Kirkor v. Bedros nâm Ermeniler ta‘rîfleriyle mu‘arrefe olan mezbûre Persaye meclis-i ma‘kūd-ı mezbûrda li-ebeveyn ammi işbu râfi‘u’l-vesîka Anton v. Kirkor nâm Ermeni muvâcehesinde bi-tav‘ihâ ikrâr ve takrîr-i kelâm edip babam hâlik-i merkūm Kazazros ammim mezbûr Anton ile bezzâzlık san‘atında şerîkler olmağla nısfı babam mezbûrun ve nısf-ı âharı ammim merkūmun mahlût on beş bin guruş sermâyelerinin babam mezbûrun hîn-i helâkinde nısfı mertebesi zimmetimde bulunmağla der-akab cem‘ u tahsîli bir vechile mümkün olmayıp lâkin mezbûr Anton babam hâlik-i mezbûrun nısf mülk şirketi olan yedi bin beş yüz guruşu mevcûd ve zimem deruhde ve kabûl eyledikden sonra meblağ-ı mezbûr yedi bin beş yüz guruş verese-i mezbûreye zimmetinde vâcibü’l-edâ deyni olduğunu ba‘de’l-ikrâr meblağ-ı mezbûrun beş yüz yirmi guruşunu ol târihde benimle sagīrân-ı mezbûrânın vasîleri olan anam mezbûre Derohi’ye teslîm edip mâ‘adâsı olan altı bin dokuz [yüz] seksen guruşu def‘aten edâya iktidârı olmamağla biz dahi meblağ-ı bâkī-i mezbûru alâ mehlin ahz u istîfâya râzı olduğumuza binâen ammim mezbûr Anton meblağ-ı bâkī-i mezbûr altı bin dokuz [yüz] seksen guruşdan tashîh-i mezbûr üzere benim yedi sehm hisseme isâbet eden [55b] bin iki yüz yirmi bir buçuk guruşu târih-i mezbûrdan bir sene tamâmına değin bana edâya ta‘ahhüd ve iltizâm eyledikden sonra ammim mezbûr Anton’un oğlu Zakar nâm Ermeni dahi meblağ-ı mezbûra kefîl ve dāmin olmuş idi hâlâ ammim mezbûr Anton babam hâlik-i mezbûrun mâl-ı şirketinden hisse-i mûrisem olan meblağ-ı mezbûra<> bin iki yüz yirmi bir buçuk guruşu mahallinde bana def‘ u teslîm edip ben dahi ber-vech-i muharrer yedinden bi’t-tamâm ahz u kabz eylediğimden sonra meblağ-ı mezbûr bin iki yüz yirmi bir buçuk guruşa ve babam hâlik-i mezbûrun mâl-ı şirketinden hisse-i şer‘iyyeme müte‘allika da‘vâdan ammim mezbûr Anton’un ve oğlu mezbûr Zakar’ın zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm babam hâlik-i mezbûrun terekesine müte‘allika ammim mezbûr Anton ile vechen mine’l-vücûh da‘vâ ve nizâ‘ım bâkī kalmamışdır dedikde gıbbe’t-tasdîki’ş-şer‘î vâki‘ hâl mevlânâ-yı mezkûr mahallinde ketb ü tahrîr ve ma‘an ba‘s olunan Çukadâr Süleyman ve Muhzır Halil ile mahfel-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sânî ve’l-ışrîn min-Muharremi’l-harâm sene 1138. Şuhûdü’l-hâl: Mehmed Odabaşı, Duhânî el-Hâc İsmail, Münadi Mahmud Çelebi, Bezzazistan Ahmed Çelebi, Dökmeci Ahmed Çelebi, Yorgani Mustafa Çelebi, Serbölük Halil Çelebi, Kirkor v. Bedros, Papa Mıgırdıç [v.] Karabet, Ariton v. Anton, Avanis v. Ariton, Asvador v. Kigork, Sahak v. Karabet, Abraham v. Karabet, Bedros v. Asvador.