Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 342 Hüküm no: 378 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Ali’nin avârız vakfından istiğlal yoluyla ödünç para aldığı Mahrûse-i Galata a‘mâlinden kasaba-i Tophane’de Cihangir mahallesinde sâkin Mustafa b. Ali nâm kimesne meclis-i şer‘de mahmiye-i İstanbul’da Oruçgazi mahallesi avârızına mevkūfe nükūda bi’l-fi‘il mütevellî olan işbu râfi‘u’l-vesîka Kâmi Abdurrahman Efendi b. Yahya nâm kimesne mahzarında ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan ba‘zen Rabia Hâtun ve ba‘zen Çavuşzâde veresesi mülkleri ve bir tarafdan ba‘zen el-Hâc Mustafa ve ba‘zen el-Hâc Mehmed menzili ve bir tarafdan Bıçakcı Hüseyin menzili ve bir tarafdan tarîk-i âm ile mahdûd fevkānî üç bâb oda ve dehlîz ve bir sofa ve tahtânî bir bâb oda ve bir sofa ve matbah ve mahtab ve bir kenîf ve bi’r-i mâ ve eşcâr-ı müsmire ve gayr-i müsmireli mülk menzilimi mütevellî-i mezbûr Kâmi Abdurrahman Efendi[ye] bi-tarîkı’l-istiğlâl iki yüz guruşa bey‘ u teslîm eylediğimde ol dahi yedinde olan mâl-ı vakf ile ber-vech-i muharrer iştirâ ve tesellüm ve kabûl eyledikden sonra meblağ-ı mezbûr iki yüz guruşu mütevellî-i mezbûr yedinden tamâmen ba‘de’l-ahz ve’l-kabz mezbûr Abdurrahman Efendi menzil-i mahdûd-ı merkūmu ba‘de’t-tahliyeti’ş-şer‘iyye ve’t-tekābuzi’l-mer‘î târih-i kitâbdan iki sene tamâmına değin altmış guruşa bana îcâr ve teslîm ve ben dahi ber-vech-i muharrer istîcâr ve kabûl eyledim dedikde gıbbe’t-tasdîki’ş-şer‘î mezbûr Mustafa’nın karındaşı Mehmed Odabaşı b. Ali dahi derk-i menzil-i mezbûra ve ücret-i lâzimesine tarafeynden emr ve kabûlü hâviye kefâlet-i sahîha-i şer‘iyye ile kefîl ve dāmin olduğunu mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis aşer min-Muharremi’l-harâm sene 1138. Şuhûdü’l-hâl: Süleyman Efendi b. Osman, Molla İbrahim b. Hüseyin, İbrahim Çelebi b. Muharrem, Halil Çelebi b. Mustafa, Mustafa b. Ahmed, Ali b. Ahmed.