Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 343 Hüküm no: 380 Orijinal metin no: [55b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boğazkesen Hisarı mahallesi mescidi vakfı mütevelliliğine Zührab Ağa’nın mütevellî tayin edildiği Mâ fîhi mine’n-nasb ve’t-ta‘yîn sadara annî nemakahu’l-fakīr ileyhi celle şânuhû el-Hâc Mustafa el-Kādî bi-medîneti Galata -gufira lehû-. Merhûm Başmakcı Şucâ‘addin nâm sâhibü’l-hayrın mahrûse-i Galata muzâfâtından İstinye nâhiyesine tâbi‘ Boğazkesen Hisârı kurbünde ismiyle tesmiye olan mahallesinde vâki‘ mescid-i şerîfine mevkūf yüz otuz guruş nükūdun ber-vech-i hasbî mütevellîsi olan el-Hâc Mustafa fevt olmağla nükūd-ı mevkūfe-i mezbûreye bir mütevellî nasbından lâ-büd olup ve hisâr-ı mezbûrda kule ağası olan Zührab Ağa tevliyet uhdesinden gelmeğe kādir olduğu hisâr-ı mezbûr ahâlîsinden İmâm Salih Efendi b. Yahya ve Mehmed Ağa b. Osman ve Hafız Abdullah Efendi b. Ahmed ve Ömer Çelebi b. Sefer ve Ahmed Çelebi b. Süleyman ve Halil Beşe b. Mehmed nâm kimesneler ihbâr etmeğin hâkim-i muvakkı‘-ı a‘le’l-kitâb -rafa‘a kadrahû mevlâhü’l-vahhâb- hazretleri dahi işbu râfi‘u’l-kitâb mezbûr Zührab Ağa’yı nükūd-ı mevkūfe-i mezkûreye ber-vech-i hasbî mütevellî nasb ve ta‘yîn eyledikde mezbûr Zührab Ağa dahi tevliyet-i mezbûreyi kabûl ve hizmet-i lâzimesini mahallinde ikāmete ta‘ahhüd etmeğin mâ-vaka‘a bi’l-ibtigā ketb olundu. Fi’l-yevmi’s-sâdis min-Saferi’l-hayr sene 1138. Şuhûdü’l-hâl: es-Sâbıkūne’l-mezkûrûn.