Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 344 Hüküm no: 381 Orijinal metin no: [55b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anton v. Rakalin’in Atami v. Canto’ya olan borcunu taksitlendirdiği Mahrûse-i Galata’da Balıkpazarı kapısı dâhilinde mütemekkin Anton v. Rakalin nâm zimmî meclis-i şer‘de işbu râfi‘u’r-rakīm Atami v. Canto nâm zimmî muvâcehesinde ikrâr ve takrîr-i kelâm edip merkūm Atami’ye cihet-i karz-ı şer‘îden iki yüz guruş ve dükkân ve mahzen icârelerinden dahi elli guruş ki zimmetinde cem‘an iki yüz elli guruş deynim olup meblağ-ı mezbûru mezbûr Atami’ye def‘aten edâya iktidârım o(lmay]up vech-i âtî üzere taksît ve te’cîle taksît olduğumda merkūm Atami dahi beher mâh kendüye yedişer guruş vermek üzere târih-i kitâbdan otuz altı ay tamâmına değin te’cîl ve taksît eyledikde ben dahi ber-vech-i muharrer ecel-i mezkûru kabûl ve meblağ-ı mezbûr ber-vech-i mufassal edâya ta‘ahhüd eylediğim cihetle meblağ-ı mezbûr iki yüz elli guruş ber-vech-i muharrer mü’eccel ve mev‘ûd deynimdir dedikde gıbbe’t-tasdîki’ş-şer‘î merkūm Anton’un zevcesi Dominika bt. Dominiko nâm Nasrâniye dahi meblağ-ı mü’eccel-i mezkûra kefîl ve dāmin olmağın mâ-vaka‘a bi’l-ibtigā ketb olundu. Fi’l-yevmi’l-ışrîn min-Muharrem sene 1138. Şuhûdü’l-hâl: Münâdî Mahmud Çelebi, Bezza[zi]stani Hasan Çelebi, Bezzas[zi]tani Ahmed Çelebi, Beza[zi]stani Abdullah Çelebi, Münadi Ahmed Çelebi, Yelkenci Osman Çelebi, Veli Çavuş el-mübâşir, Hancı Musa Çelebi, Yanaki v. Lefter, Panayot v. Yani, Gabril v. Zehad.