Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 346 Hüküm no: 384 Orijinal metin no: [56a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Togodoş v. Todori’nin Kaya v. Kiryazi’ye kalan yüz guruş borcuna Abacı Kostantin v. Lefter’in kefil olduğu Bakkal tâifesinden Togodoş v. Todori nâm zimmî meclis-i şer‘de işbu hâmilü’r-rakīm Kaya v. Kiryazi nâm zimmî muvâcehesinde üzerine da‘vâ ve takrîr-i kelâm edip merkūm Kaya’ya yedinde olan deyn temessükü nâtık olduğu üzere cihet-i karz-ı şer‘îden yüz guruş deynim olmağla meblağ-ı mezbûra gāib ani’l-meclis Abacı Kostantin v. Lefter nâm zimmî emrim ile kefîl oldukdan sonra meblağ-ı mezbûrun yetmiş guruşunu mukaddemâ merkūm Kaya’ya edâ ve teslîm edip zimmetinde otuz guruş deynim bâkī kalmış iken merkūm Kaya benim gıyâbımda meblağ-ı mezbûr yüz guruşu kefîlim gāib-i mezbûr Kostantin’den ahz etmeğin suâl olunup ziyâde makbûzu olan yetmiş guruşun alıverilmesi murâdımdır dedikde gıbbe’s-suâl merkūm Kaya cevâbında fi’l-vâki‘ müdde‘î-i mersûm Togodoş yedinden mukaddemâ altmış sekiz guruş vekîl-i gāib-i merkūm Kostantin’den dahi yüz guruş ahzını ikrâr lâkin benim merkūm Togodoş zimmetinde cihet-i mezbûrdan ber-mûceb-i temessük yüz yetmiş bir buçuk guruşunu kendüye hibe ve altmış sekiz guruşunu ahz ve bâkī yüz guruşa gāib-i merkūm Kostantin kefîl olmağla kefâletine binâen ahz eyledim deyü def‘le mukābele edicek gıbbe’l-istintâk ve’l-inkâr merkūm Kaya’dan def‘-i mezkûrunu mübeyyine beyyine taleb olundukda udûl-i Nasârâdan olup mahrûse-i Galata’da Sultan Bayezid mahallesinde sâkin Kiryazi v. Yani ve Rizo v. Algeli nâm zimmîler li-ecli’ş-şehâde mahfel-i şer‘a hâzırân olup isre’l-istişhâd fi’l-vâki‘ müdde‘î-i mersûm Togodoş işbu merkūm Kaya’dan mukaddemâ huzûrumuzda karz-ı hasen yüz yetmiş bir buçuk [guruşu] ahz u kabz eyleyip ba‘dehû merkūm Kaya meblağ-ı mezbûrun üç buçuk guruşunu müdde‘î-i merkūm Togodoş’a hibe ve altmış sekiz guruşunu dahi yedinden ba‘de’l-ahz ve bâkī kalan yüz guruşa merkūm Togodoş’un emriyle gāib ani’l-meclis Abacı Kostantin v. Lefter v. Yorgi kefîl ve dāmin olmuş idi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle müdde‘î-i mersûm Togodoş merkūm Kaya’ya bî-vech mu‘ârazadan men‘ birle mâ-hüve’l-vâkı‘ bi’l-ibtigā ketb olundu. Fî-selh-i Muharremi’l-harâm sene 1138. Şuhûdü’l-hâl: el-Hâc Mustafa b. Osman, Halil Çelebi b. Mustafa, Yusuf b. Abdullah, İbrahim b. Mustafa, Mustafa b. Ahmed, Ali b. Ahmed, Mehmed b. Ahmed.