Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 345 Hüküm no: 383 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühâni bt. Mehmed’in menzilini Zührab Ağa b. Abdullah’a sattığı Mahrûse-i Galata muzâfâtından kasaba-i Tophane’de Firuzağa mahallesinde sâkine Ümmühâni bt. Mehmed b. el-Hâc Mustafa nâm hâtunun sadriye kebîre kızı ve tarafından bey‘-i âti’z-zikre vekîli olduğu zât-ı mezbûreyi ma‘rifet-i şer‘iyye ile ârifân sadriye kebîre oğlu Halil Beşe b. Mehmed ve Ahmed Çelebi b. Süleyman nâm kimesneler şehâdetleriyle sâbit olan Saliha bt. Yahya nâm hâtun meclis-i şer‘de işbu sâhibü’l-kitâb Zührab Ağa b. Abdullah nâm kimesne mahzarında bi’l-vekâle ikrâr ve takrîr-i kelâm edip anam müvekkile-i mezbûre Ümmühâni Hâtun’un akd-i âtî sudûruna değin silk-i mülkümde münselik olup mahrûse-i mezbûre muzâfâtından İstinye nâhiyesine tâbi‘ Boğazkesen hisârı’nda Bey mahallesinde vâki‘ bir tarafdan müşterî-i mezbûr Zührab Ağa mülkü ve bir tarafdan el-Hâc Mehmed Reis kızı mülkü ve bir tarafdan Kırmızılı Ali mülkü ve bir tarafdan tarîk-i âm ile mahdûd tahtânî iki harâb oda ve bir kenîf ve bi’r-i mâ ve eşcâr-ı müsmire ve gayr-i müsmireli bahçeyi müştemil mülk menzilini mezbûr Zührab Ağa’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz guruşa bey‘ u teslîm edip ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr yüz guruşun elli guruşunu mukaddemâ ve elli guruşunu dahi hâlâ yedinden bi’t-tamâm ve’l-kemâl ahz u kabz eyledim ba‘de’l-yevm menzil-i mahdûd-ı mezkûr bi-cümletin mâ yeştemilühû ve yahvîhi mezbûr Zührab Ağa’nın mülk-i müşterâsı olup anam müvekkile-i mezbûrenin kat‘an alâka ve medhali kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’l-ibtigā ketb olundu. Fi’l-yevmi’s-sâdis min-Muharremi’l-harâm sene 1138. Şuhûdü’l-hâl: İmâm Salih Efendi, Müezzin Ömer Çelebi, Mehmed Ağa b. Osman, Ahmed Efendi b. Süleyman, Abdullah Çelebi b. el-Hâc Ahmed ve es-sâbıkūn.