Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 393 Hüküm no: 440 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fransa elçisiyle beyzâde, tercüman ve diğer belirtilen şahısların 1136 senesi için satın aldığı şarabın bir defalığına evlerine teslimine müsaade edildiği ve kendilerinden herhangi bir ücret de alınmadığı Mahrûse-i Galata hâricinde mütemekkin Fransız Elçisi Markiz De Bonak ve France beyzâdelerinden Cozi ve Virani ve Can Batiste Fabro ve Kalaverye ve Tabib Dermance nâm müste’menler ile Fransız tercümânlarından beş nefer ma‘lûmü’l-esâmî tercümânlar taraflarından ikrâr-ı câi’z-zikre vekîl-i müseccelleri Mihalaki v. Yorgi meclis-i şer‘de hâlâ Astâne-i sa‘âdet’de bi’l-fi‘il yeniçeri ağası olan umdetü’l-emâcid ve’l-ekârim câmi‘u’l-mehâmid ve’l-mekârim izzetlü Hasan Ağa tarafından husûs-ı âti’l-beyâna mübâşir ta‘yîn olunan Çukadâr Ali Beşe b. Abdullah ve südde-i seniyyede bi’l-fi‘il bostâncıbaşı olan umdetü’l-havâs ve’l-mukarrabîn mu‘temedü’l-mulûk ve’s-selâtîn izzetlü Mustafa Ağa tarafından kezâlik mübâşir ta‘yîn olunan Musa Haseki b. Abdülkerîm mahzarlarında bi’l-vekâle ikrâr ve takrîr-i kelâm edip ağayân-ı müşârun-ileyhimâ hazerâtına hitâben sâdır olan yedi kıt‘a fermân-ı âlîşânda kadîmden ruhsat verildiği üzere 1136 senesine mahsûben müvekkilûn-ı merkūmûndan elçi-i mersûm Marki De Bonak kendinin ve âdemlerinin kifâf-ı nefsleriʼçün İstanbul’a karîb iskele ve yalılardan beher müdresi onar vakiyye olmak üzere akçesiyle iştirâ eylediği yedi bin müdre ve merkūmûn Cozi ve Virani ve tabîb Dermance’den her birinin biner müdre ve merkūm Can Batista Fabro’nun üç bin müdre ve merkūm Kalaverye’nin bin beş yüz müdre ve beş nefer tercümânlardan her birinin dahi kezâlik biner müdre ki min-haysü’l-mecmû‘ on dokuz bin beş yüz müdre hamrlarını Galata’da mahzenlerine nakl eylediklerinde ağayân-ı müşârun-ileyhimâ ve Galata voyvodası vesâir ehl-i örf taraflarından resm ve harc ve avâyid ve rüsûm-ı sâire talebiyle rencîde ve ta‘arruz etdirilmeye deyü mastûr ve mukayyed olmağın müvekkillerim merkūmûn dahi ber-vech-i muharrer 1136 senesine mahsûben iştirâ eyledikleri cem‘an on dokuz bin beş yüz müdre hamrlarını Galata’da vâki‘ mahzenlerine nakl eylediklerinde ağayân-ı müşârun-ileyhimâ taraflarından ve gayrıdan resm ve avâyid ve rüsûm-ı sâire talebiyle bir ferde dahl ü ta‘arruz eylememişdir dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fî 20 L sene [1]137. Şuhûdü’l-hâl: Ahmed Efendi b. Süleyman, Süleyman Efendi b. Osman, Serbölük Halil Çelebi, İbrahim Çelebi b. Muharrem, Mehmed b. Ahmed, Ali b. Ahmed, Mustafa b. İbrahim.