Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 394 Hüküm no: 441 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balıkcı Ayvaz v. Kirkor’un Çukadar Halil’den satın aldığı menzilde ikametine mani olunmaması Galata kādısı fazîletlü efendi husûs-ı mezbûra müvellâ ta‘yîn buyurulmak mercûdur. Ed-dâ‘î Abdullah -afâ anhu-. İşâretleri mûcebince Galata kādısı fazîletlü efendi şer‘le ahvâlleri görüp i‘lâm eyleyesiz deyü buyruldu. Semâhatlü inâyetlü fazîletlü efendim sultânım -tâbe bakāhu- hazretlerinin hak sübhânehû ve te‘âlâ vücûd-ı mükerrem-i âlî-kadrlerin ekdâr-ı kevnden masûn mahfûz edip sâye-i devletlerin derd-mendân üzerinden dûr eylemeye arzuhâl-i kulları oldur ki mahrûse-i Galata dâhilinde sâkin Sultan Bayezid mahallesinde sâkin Kodavrodi nâm zimmî mutasarrıf olduğu mülk menzilini vâlidem mezbûre ile babam Haçador nâm zimmî ile câriyelerine semen-i ma‘lûma bey‘ ve kabz-ı semen edip bir vechile dahl olunmak îcâb etmez iken civârında vâki‘ ashâb-ı ağrâzdan ba‘zı kimesneler mücerred ve mukaddem Müslimân menzili idi deyü müdâhaleden hâlî olmamağla merâhim-i aliyyelerinden mercûdur ki yedimde olan fetvâ-yı şerîfe ve hüccet-i şer‘iyye mûcebince Galata kādısı fazîletlü efendi mezbûrların te‘addîlerin men‘ u def‘ eylemek bâbında işâret-i aliyyeleri ricâ olunur bâkī emr sultânımındır. Bende Haçador Zimmî, Ayvaz Zımmî İ‘lâmı mûcebince amel olunmak bâbında. Ma‘rûz-ı dâ‘î-i Devlet-i aliyyeleridir ki Sâdır olan fermân-ı âlîlerine imtisâlen sâhib-i arzuhâl merkūm Ayvaz zimmî Galata’da vâki‘ Sultan Bayezid mahallesi ahâlîsinden İmâm Ali Efendi ve es-Seyyid Mehmed ve Hammâmî Ali ve el-Hâc Ali vesâirleri mahzarlarında mahalle-i mezbûrede vâki‘ bir tarafdan Mühtedi İbrahim menzili ve iki tarafdan Karakaş ve Aleksan nâm zimmîler menzilleri ve bir tarafdan tarîk-i âm ile mahdûd mülk menzil arsasının mukaddemâ mâliki olan Çukadâr Halil nâm kimesne civârında olanların ekserî kefere menzilleri olup ve mahalle-i mezbûre mescid-i şerîfden ba‘îd ve Ermeni Kenîsesi’ne karîb olmağla arsa-i merkūme üzerine Müslimân menzili binâ ve içinde Müslimân sâkin olmak bir vechile mümkün olmamağın merkūm Çukadâr Halil dahi arsa-i merkūmeyi bana bey‘ ve tarafımdan vekâleten arsa-i merkūme üzerine mâlım ile benim için bir menzil binâ ve ihdâs edivermekle hâlâ ben menzil-i merkūmda sâkin olmak eylediğimde eşhâs-ı mezbûre menzil-i merkūmun arsası mukaddemâ [Müslimîn]menzili arsası idi deyü yedimde olan fetvâ-yı şerîfe ve musahhah fermân-ı âlîye mugāyir beni menzil-i mezbûrda sâkin olmadan men‘ ederler deyü da‘vâ ve hâlâ mesned-nişîn-i sadr-ı fetvâ ve serîr-ârâ-yı fazl ve takvâ olan şeyhülislâm sellemehü’l-meliki’s-selâm hazretlerinin ünvân-ı şerîfleriyle mu‘anvene takrîr-i meşrûhuna mutâbık bir kıt‘a fetvâ-yı şerîfe ile bir kıt‘a fermân-ı âlî ısdâr edicek evvelen fetvâ-yı şerîfeye nazar olundukda Müslimîn ve kefere muhteliten sâkin olan mahalle ahâlîsinden Zeyd Müslim mahalle-i merkūmede vâki‘ mülk menzil arsasını Amr-ı zimmîye bey‘ edip Amr dahi arsada menzil binâ edip süknâ murâd eyledikde ba‘zı kimesneler ol menzilin arsası mukaddemâ Müslim menzili arsası idi deyü Amr’ı men‘a kādir olurlar mı el-cevâb olmazlar deyü tasrîh olunup ve sâniyen fermân-ı âlîye nazar olundukda Galata’da Sultan Bayezid mahallesinde kal‘a dibinde vâki‘ Ayvaz zimmînin sâkin olduğu mahallede ba‘zı kimesneler merkūmu ta‘cîz için ihrâc murâd edip lâkin menzil-i mezbûrda ehl-i İslâm sâkin olmak bir vechile mümkün olmayıp civârında olanların ekserî zimmî menzilleri olmağla mesfûr Ayvaz derûnunda kemâ-kân sâkin olup ihrâc için ta‘cîz ve rencîde etdirmeyip âhara dahi sirâyet eylememek şartıyla mücerred merkūm Ayvaz hâne-i merkūmede ikāmet olunmasına mümâna‘at etdirilmeyip bu âna dek bir tarîkle ihrâc dahi olunmuş ise getirdip iskân etdirdip hilâf-ı fermân-ı âlî bî-vech te‘addî etdürülmeye deyü buyurulup ve eşhâs-ı mezbûreden her biri dahi fetvâ-yı şerîfe ile mazmûn-ı fermân-ı âlîyi ikrâr etmeğin ber-mûceb-i fetvâ-yı şerîfe ve fermân-ı âlî merkūm Ayvaz’ın menzil-i merkūmda sâkin olmasına mümâna‘at eylememek üzere eşhâs-ı mezbûreye tenbîh olunduğu huzûr-ı âlîlerine i‘lâm olundu fermân men-lehü’l-emrindir. Fî 22 C sene [1]137