Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 406 Hüküm no: 456 Orijinal metin no: [73b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Azak Kalesi’ne cephane götüren gemide suç işlediği gerekçesiyle küreğe konan es-Seyyid Mustafa’nın serbest bırakılması için Galata esnafının kefil olduğu Devletlü ve sa‘âdetlü ve inâyetlü sultânım hazretleri sağ olsun Bu fakīre ihtiyâr câriyenizin oğlum Seyyid Mustafa’nın bir kimesneye te‘addîsi yoğiken Azak kalesine cebehâne götüren sefînenin yeniçerileri birbiriyle gavga edip oğlumun cürmü yoğiken cebehâne çorbacısı oğlumu ahz ve efendime gönderdikde devletlü efendimin vaz‘-ı kürek olmağla fermânları olup lillâh ve li-resûlihî oğlumun yarâr kefîlleri alınıp kürekden âzâd ve ıtlâk buyurmaları ricâ olunur . Fâtıma Hâtun. Ne vechile habs olunmuşdu[r] derkenar Be-nâm-ı Seyyid Mustafa Fî 17 N Sene 1136 Mezbûr Seyyid Mustafa Kavak’da cebehâne tahmîl olunan sefîneyi basıp envâ‘-ı kabâhat etmeğle cebehâne üzerine ta‘yîn olunan çorbacı ahz ve kāimmakāma i‘lâm-ı mezbûr icrâ ve deryâdan Halil Bey sefînesine vaz‘ olunmak üzere fermân-ı âlî sâdır olduğu Fîmâ ba‘d İstanbul ve havâlîsine gelmeyip gelirse ahz ve cezâsı tertîb olunmak şartıyla diyâr-ı âharda meks ü gavga eylememek üzere yarâr kefîller alınıp ıtlâkıʼçün i‘lâm olunmak buyuruldu. Ma‘rûz-ı dâ‘î-i Devlet-i aliyyeleridir ki Sâdır olan fermân-ı âlîleri üzere mücrim-i mezbûr es-Seyyid Mustafa ba‘de’l-yevm diyâr-ı âharda meks ve ikāmet eyleyip İstanbul ve havâlîsine gelmeyip eğer bir tarîk ile gelirse ahz ve cezâsı tertîb olunmak üzere mezbûrun nefsine ve lede’l-hâce meclis-i şer‘a ihzârına kalafatcı tâifesinin mu‘temedlerinden Galata’da Okcu Musa mahallesinde sâkin İsmail Beşe b. Mehmed ve Garbkapısı’nda sâkin es-Seyyid Ahmed b. Mehmed nâm kimesneler kefîl olup küfelân-ı mezbûrân İsmail Beşe ve es-Seyyid Ahmed’e dahi kalafatcılar kethudâsı el-Hâc Mehmed b. Ali ile müsin ve ihtiyâr ustalarından Usta Mustafa b. Osman ve Usta Hasan b. Veli ve Usta Mehmed b. Mehmed ve Usta İbrahim b. Abdullah ve Usta Mustafa b. Hasan nâm kimesneler kefîller olduğu Galata’da tescîl-i şer‘î olunmağın küfelâ-i merkūme mücrim-i mezbûr es-Seyyid Mustafa’nın kürekden ıtlâkını iltimâs eyledikleri huzûr-ı âlîlerine i‘lâm olundu. Emr men lehü’l-emrindir. Fî 16 N sene [1]137. Not: [74a] boştur