Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 405 Hüküm no: 455 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da yangınlara engel olmak için hane, dükkan ve mahzenlerin ahşap yerine kârgir yapılacağı Akzā kuzāti’l-Müslimîn evlâ vülâti’l-muvahhidîn ma‘deni’l-fazl ve’l-yakīn vârisü ulûmi’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‘în mevlânâ İstanbul kādısı -zîdet fezâiluhû- ve iftihârü’l-ümerâ ve’l-ekâbir müstecmi‘u cemî‘i’l-me‘âlî ve’l-mefâhir el-muhtassu bi-mezîdi inâyeti’l-meliki’l-kādir Dergâh-ı mu‘allâm yeniçerileri ağası ( ) -dâme ulüvvuhû- ve kıdvetü’l-emâsil ve’l-akrân hâssa mi‘mârbaşı ( ) -zîde kadruhû- tevkī‘-i refî‘-i hümâyûn vâsıl olıcak ma‘lûm ola ki mahmiye-i Kostantıniyye -hamâhallâhu te‘âlâ ani’l-âfâk ve’l-beliyye-de vâki‘ mecmû‘ hâne ve dekâkîn ve mehâzîn ve bekâr odaları hâssa menâzilden mâ‘adâ akār makūlesinden her ne olursa olsun ashâbı olanlar kârgir binâ eyledikleri hâlde ilâ-mâşâallâhu te‘âlâ müstakar ve ber-devâm olduğundan gayri -iyâzen billâli te‘âlâ- harîk vukū‘unda dahi her biri resîd-i sedîd olup itfâsına vesîle-i azîme ve ahşâbdan olduğu sûretde ateşe hâil olmayıp ibâdullâhın hânumânsız olmasına âlet-i cesîme olacağı müşâhede olunmağla fîmâ ba‘d bu makūleler mücedded binâ olunmak lâzım geldikde ahşâbdan yapılmayıp kârgir binâ olması Ümmet-i Muhammed vesâir ibâdullâha enfa‘ bir hâlet olduğu bedîhiyyâtda olmağın imdi gerek mukaddem muhterik olan mahallerde ve gerek bu def‘a vukū‘ bulan harîklerde muhterik veyâhud hâlâ ve fimâ ba‘d bozup tecdîdi irâde olan hâne ve dekâkîn ve mehâzîn ve bekâr odaları hâsılı bâlâda tahrîr olunduğu vecih üzere menâzilden ma‘adâ her ne olursa olsun ashâbı binâ eylemek murâd eylediklerinde ahşâbdan binâ eylemeyip bi’l-cümle kârgir inşâ eylemek üzere ashâbına ve neccârîn-i binâ tâifesinden tenbîhi lâzım gelenlere tenbîh ve te’kîd ve mütenebbih olmayıp fermân-ı hümâyûnuma mugāyir hareket ile ahşâbdan binâya mübâşeret eder olur ise men‘ u def‘ ve muhkem haklarından gelinmek için ahz ve binâsına şurû‘ eden neccâr kalfaları ve kârhânecileri dahi ibreten li’s-sâirîn cümle küreğe vaz‘ olunmak üzere i‘lâm olunup ve bu fermân-ı hümâyûnumun mazmûn-ı münîfi dâimâ mer‘î tutulup düstûrü’l-amel ve fîmâ ba‘d bu nizâmın hilâfına ruhsat ve müsâ‘ade gösterilmemek üzere İstanbul kazāsı mahkemelerinde birer sûreti sicillâta kayd ve Galata ve Hâslar ve Üsküdar mahkemelerinde dahi sicillâta sebt olunmak için birer sûret verilip ale’d-devâm mazmûn-ı emr-i şerîfimin mürâ‘âtında dikkat ve ihtimâm eyleyip ser-i mû hilâfına rızâ ve cevâz göstermemek be-gāyet ittikā ve ihtirâz olunmak bâbında fermân-ı âlîşânım sâdır olmuşdur buyurdum ki ( ) vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittiba‘ ve lâzimü’l-imtisâlimin mazmûn-ı itâ‘at-makrûnayla âmil olup hilâfından ittikā eyleyesiz şöyle bilesiz alâmet-i şerîfime i‘timâd kılasız. Tahrîren fî-evâhir-i Şa‘bâni’l-mu‘azzam sene 1137. Kostantıniyyetü’l-mahrûse.