Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 79 Hüküm no: 1 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Civelek İsmail Beşe’nin kahveci dükkanı gediğinin babası Osman tarafından Marangoz Osman Beşe’ye satıldığı Galata’da sâkin Civelek İsmail Beşe b. Osman nâm kimesne Galata Bâb Mahkemesi’nde meclis-i şer‘de Marangoz Osman Beşe b. Mehmed nâm kimesne muvâcehesinde mezbûr Civelek İsmail Beşe’nin babası diğer Osman b. Hasan nâm kimesne hâzır olduğu hâlde Galata’da Kürkcüler sükûnda kâin mâlik olduğum bir bâb kahveci dükkânı derûnunda mevcûde gedik tâ‘bir olunur ber-mûceb-i defter-i müfredât âlât-ı lâzıme-i ma‘lûme yedimde mülküm iken ben târih-i i‘lâmdan bir buçuk sene mukaddem diyâr-ı âhara gidip diyâr-ı âharda sâkin iken mezbûr Marangoz Osman Beşe âlât-ı ma‘lûmemi fuzûlî zabt etmekle suâl olunup âlât-ı ma‘lûmeden kasr-ı yed ve bana teslîme tenbîh olunmak matlûbumdur deyü ba‘de’d-da‘vâ ve’l-istintak mezbûr Marangoz Osman Beşe dahi cevâbında müdde‘î-i mezbûr târih-i mezkûrda âlât-ı ma‘lûmeyi semen-i misliyle âhara bey‘a ve kabz-ı semene tarafından babası hâzır-ı mezbûr diğer Osman’ı mahzar-ı şuhûdda tevkîl ol dahi ba‘de kabûli’l-vekâle hîn-i bey‘de semen-i misli olan dört yüz elli guruşa oğlu müvekkil-i müdde‘î-i mezbûr muvâcehesinde bi-safkatin vâhidetin bana bey‘ ve temlîk ve teslîm ben dahi ber-vech-i meşrûh iştirâ ve tesellüm ve kabz ve kabûl etmişidim bu vechile âlât-ı ma‘lûme şirâen mâlım olmağın bi-hakkın vaz‘-ı yed ederim deyü ba‘de’d-def‘ ve’l-inkâr dâfi‘-i mezbûr def‘-i mezkûrunu mahallinde lede’t-tezkiye adâletleri zâhir olan İbrahim Ağa b. el-Hâc Hüseyin ve Mehmed Beşe b. Salih şehâdetleriyle muvâcehesinde vech-i şer‘î üzere isbât etmeğin mûcebince müdde‘î-i mezbûr Civelek İsmail Beşe da‘vâ-yı mezkûresiyle mezbûr Marangoz Osman Beşe’ye bî-vech-i şer‘î mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 4 M sene [1]221.