Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 81 Hüküm no: 6 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbetçi Vasil v. Yorgi’nin Filikacı Panayot’dan yüz elli guruş alacaklı olduğu Sâhib-i arzuhâl Şerbetçi Vasil v. Yorgi zimmî Galata Bâb Mahkemesi’nde meclis-i şer‘de derûn-ı arzuhâlde mezkûrü’l-ism Filikacı Panayot v. Kostantin zimmî muvâcehesinde ben bundan akdem mersûm Panayot zimmî yedinden iktirâz ve kabz eylediğim yüz elli guruş deynim mukābelesinde mâlımdan dülbend üzerine işleme on bir aded abânî kuşağımı mersûm Panayot zimmî yedine rehin vaz‘ ve teslîm eylediğimden sonra târih-i i‘lâmdan bir sene mukaddem mersûm Panayot zimmî meblağ-ı merkūmu benden ahz u kabza damadım işbu hâzır bi’l-meclis Ziso zimmîyi tevkîl ve zikrolunan kuşakları benim rızâm ile hâzır-ı mersûm yedine ba‘de’t-teslîm merkūm Ziso zimmî meblağ-ı mezkûru benden bi’l-vekâle ahz u kabz ve zikrolunan kuşakları bana teslîm ettikden sonra mersûm Panayot zimmî beni Tersâne-i âmire mahbesinde habsettirip yüz elli guruşu ahz etmekle istirdâd ederim deyü da‘vâ eyledikde ol dahi cevâbında ber-vech-i muharrer yüz elli guruş ahzını ikrâr, mersûm Ziso zimmîyi tevkîlini inkâr etmekle müdde‘î-i mersûm Vasil zimmî ber-vech-i muharrer tevkîl müdde‘âsını mahallinde lede’t-tezkiye makbûlü’ş-şehâde idükleri ihbâr olunan Nikola v. Kostantin ve Dimitri v. Yani nâm zimmîler şehâdetleriyle mersûm Panayot zimmî muvâcehesinde vech-i şer‘î üzere isbât etmeğin mûcebince meblağ-ı merkūm yüz elli guruşu müdde‘î-i mersûm Vasil zimmîye redd ü teslîme mersûm Panayot zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 5 M sene [1]221.