Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 81 Hüküm no: 5 Orijinal metin no: [1b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefîse bt. Ali’nin Seyyid Mehmed Çelebi aleyhine açtığı ecr-i misl davasında sulh olduğu Kasaba-i Kasımpaşa’da Yahya Kethüdâ Mahallesi’nde sâkine ve zâtı mu‘arrefe sâhibe-i arzuhâl Nefîse bt. Ali nâm hatun Galata Mahkemesi’nde meclis-i şer‘de derûn-ı arzuhâlde mezkûrü’l-ism abacı esnâfından es-Seyyid Mehmed Çelebi b. el-Hâc Ebûbekir nâm kimesne muvâcehesinde ben bundan akdem mezbûr es-Seyyid Mehmed’in talebiyle bir husûsunu rü’yet edinceye kadar ücret kavlinsiz kendiye eylediği üç ay hizmetimin ecr-i mislini taleb ederim deyü tasaddî eylediğim da‘vâmdan bâ-vesâtet-i muslihîn mezbûr es-Seyyid Mehmed Çelebi ile on iki buçuk guruş bedel-i makbûza ba‘de’s-sulh ve’l-kabûl husûs-ı mezkûrda ziyâde ecr-i misl mütâlebesine müte‘allika da‘vâdan mezbûr es-Seyyid Mehmed Çelebi’nin zimmetini kabûlü hâvî ibrâ ve iskāt edip bu vechile kat‘-ı nizâ‘ eyledik deyü ikrâr ve tasdîkleri tescîl ve mübâşirleri İbrahim Çavuş kulları yediyle huzûr-ı âlîlerine i‘lâm olundu. Fî 10 M sene [1]221.