Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 82 Hüküm no: 8 Orijinal metin no: [2a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Bedros’un Makar v. Avak’tan yirmi dokuz guruş alacağı olduğu Bâ‘isü’l-i‘lâm Hayyât Bedros v. Avanis zimmînin şerbetçi hizmetkârlarından Makar v. Avak zimmî zimmetinde ücret-i hıyâtetden ve vezn ve zirâ‘ı beynlerinde ma‘lûm çuka ve ibrişim ve kaytan semenlerinden kırk dokuz guruşdan bâkī yirmi dokuz guruş alacak hakkı olduğu Galata’da mahfil-i kazâda lede’l-murâfa‘a ve’l-muhâsebe mersûm Makar zimmînin ikrârıyla şer‘an sâbit olmağın alâ-mûcibi ikrârihi meblağ-ı bâkī-i mezkûr yirmi dokuz guruşun müdde‘î-i mersûm Bedros zimmîye edâsıyla mesfûr Makar zimmî ilzâm olunduğu bi’l-iltimâs huzûr-ı âlîlerine i‘lâm olundu. Fî 4 M sene [1]221.