Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 84 Hüküm no: 13 Orijinal metin no: [2a-8] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salti bt. Filikacı Panayot’un eski kocası Ziso v. Yani aleyhine açtığı alacak davasında iddiasını ispat edemediği Galata’da Sultan Bayezid Mahallesi’nde mütemekkine Salti bt. ( ) Nasrâniye’nin babası ve tarafından husûs-ı âti’z-zikre vekîl olduğu şahs-ı mersûmeyi ârifân es-Seyyid Ömer Çavuş b. Mehmed ile Simyon v. Dimitri zimmî şehâdetleriyle sâbit olan Filikacı Panayot v. Kostantin zimmî Galata Mahkemesi’nde meclis-i şer‘de müvekkile-i mersûmenin zevc-i sâbıkı Ziso v. Yani zimmî muvâcehesinde kızım müvekkile-i mersûme Salti Nasrâniye’nin gāib ani’l-meclis Vasil v. Yorgi zimmî zimmetinde cihet-i karzdan alacağı olan yüz elli guruşu ahz u kabza ve kendisine bundan akdem mersûm Ziso zimmîyi tarafından tevkîl edip ol dahi ba‘de kabûli’l-vekâle meblağ-ı merkūmu gāib-i mersûmdan kabz edip lâkin müvekkilem kızım mersûmeye teslîm etmeyip yedinde kalmağla bi’l-vekâle taleb ederim deyü da‘vâ eyledikde ol dahi cevâbında ber-vech-i muharrer ikrâr lâkin müvekkile-i mersûme meblağ-ı merkūm yüz elli guruşun mütâlebesine ve hukūk-ı sâire-i şer‘iyyeye müte‘allika âmme-i da‘vâdan benim zimmetimi ibrâ ve iskāt edip ben dahi ibrâsını kabûl etmişidim deyü eylediği def‘ini lede’t-tezkiye makbûlü’ş-şehâde idükleri ihbâr olunan Papa Yorgi v. Yani ve Dimitri v. Yorgi nâm zimmîler şehâdetleriyle isbât etmeğin mûcebince vekîl-i mersûm da‘vâ-yı mezkûresiyle mersûm Ziso zimmîye bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî 7 M sene [1]221.