Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 85 Hüküm no: 18 Orijinal metin no: [2b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Saîde Hatun’un eski kocası Hacı Mustafa aleyhine açtığı alacak davasında iddiasını ispat edemediği Galata’ya muzâfe kasaba-i Kasımpaşa’da Seydî Ali Çelebi Mahallesi’nde sâkine zâtı mu‘arrefe Şerife Saîde bt. es-Seyyid Halil nâm hatun Galata Bâb Mahkemesi’nde meclis-i şer‘de zevc-i sâbıkı el-Hâc Mustafa b. Mehmed nâm kimesne muvâcehesinde mezbûr el-Hâc Mustafa zevc-i dâhilim olup târih-i i‘lâmdan yirmi beş gün mukaddem beni tatlîk etmekle zimmetinde mütekarrir ve ma‘kūdun-aleyh mehr-i müeccelim olan otuz guruş ile nafaka-i iddet-i ma‘lûmem için on guruş ki cem‘an kırk guruşu taleb ederim deyü da‘vâ eyledikde ol dahi cevâbında ber-vech-i muharrer sâbıkā zevcesi olduğunu ikrâr lâkin zikrolunan mehr-i müeccel-i mezbûr otuz guruş ile nafaka-i iddeti üzerine benimle muhâla‘a-i sahîha-i şer‘iyye ile hul‘ olmuş idi deyü ba‘de’d-def‘ ve’l-inkâr dâfi‘-i mezbûr def‘-i mezkûrunu lede’t-tezkiye şehâdetleri makbûle olan es-Seyyid Hasan b. es-Seyyid Ali ve Mehmed b. Ali şehâdetleriyle mezbûre Hâcce Şerife Saîde muvâcehesinde vech-i şer‘î üzere isbât etmeğin mûcebince müdde‘iye-i mezbûre Şerife Saîde da‘vâ-yı mezkûresiyle mezbûr el-Hâc Mustafa’ya bî-vech mu‘ârazadan men‘ olunduğu bi’l-iltimâs. Fî 2 M sene [1]221.