Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 90 Hüküm no: 29 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah b. Mustafa’nın küçük oğlu Mustafa ile ilgili boşandığı karısı Ayşe bt. Ali aleyhine açtığı velâyet davasından vazgeçtiği Hadâyık-ı hâssadan Dolmabahçe ocağı bostânîlerinden Abdullah b. Mustafa Galata Bâb Mahkemesi’nde meclis-i şer‘de zevce-i mutallakası mu‘arrefetü’z-zât Âişe bt. Ali nâm hatun muvâcehesinde mezbûre Âişe Hatun ile hâl-i zevciyyet beynimizde kāim iken firâşımdan hâsıl ve mezbûreden mütevellid sagīr oğlum Mustafa’yı nafaka-i mukaddere-i ma‘lûme ile bi-hakkı’l-hıdâne terbiye ve imsâk üzere iken mezbûre Âişe nefsini sagīr-i mezbûra ecnebî kimesneye bu esnâda tezvîc-birle hakk-ı hıdâne kendiden sâkıt olup nisvândan hâdıne-i uhrâsı olmadığına binâen bana râci‘ olmağla sagīr-i mezbûru mezbûreden taleb ederim deyü bundan akdem da‘vâya tasaddî etmişidim lâkin sagīr-i mezbûru mezbûre Âişe kendi infâk ve iksâ edip benden nesne taleb eylememek üzere ta‘ahhüd eyledikde ben dahi da‘vâ-yı mezkûremden fâriğ ve sagīr-i mezbûru vâlidesi mezbûre yanında kemâ-fi’l-evvel terk ve ibkā eyledim deyü ikrâr ve tasdîkleri tescîl. Fî 19 M sene [1]221.