Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 90 Hüküm no: 28 Orijinal metin no: [3a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ömer b. Seyyid Hüseyin’in kendisine ayıplı cariyesini sattığı iddiasıyla Hadice bt. Hacı Ahmed aleyhine açtığı davada haksız olduğunun anlaşıldığı Havâss-ı refi‘a kazâsı mahallâtından Abdülvedûd Mahallesi’nde sâkin es-Seyyid Ömer b. es-Seyyid Hüseyin Galata Bâb Mahkemesi’nde meclis-i şer‘de Galata’da el-Hâc A‘mâ Mahallesi’nde sâkine Hadice bt. el-Hâc Ahmed b. Mehmed nâm hatun tarafından husûs-ı âti’z-zikrde vekîl olduğu zât-ı mezbûreyi bi’l-mu‘arrefeti’ş-şer‘iyye ârifân Hüseyin b. Hasan ve Yahya b. Mehmed nâm kimesneler şehâdetleriyle sâbit olan Osman Efendi b. Mehmed nâm kimesne muvâcehesinde târih-i i‘lâmdan otuz beş gün mukaddem sekiz yüz guruş semen-i medfû‘ ve makbûza müvekkile-i mezbûre Hadice Hatun yedinden ve mâlından iştirâ ve kabz eylediğim işbu hâzıra bi’l-meclis uzun boylu Râşende bt. Abdullah nâm Zenciye câriyenin şirâ’ tarihinden mukaddem hamli olup haml-i mezkûru benim yedimde iken iskāt edip ol vechile mu‘ayyebe olduğu ma‘lûmum oldukdan sonra ayb-ı mezkûr ayb-ı yesîr olup zarâr etmez mülâhazasıyla câriye-i mezbûreye kābile ma‘rifetiyle müdâvât eylediğimden sonra gāib ani’l-meclis sâbıkā Humbarahâne-i âmire Nâzırı merhûm Ya‘kub Efendizâde Mehmed Salih Efendi’ye bey‘ için arz eylediğimde gāib-i mezbûr dahi câriye-i merkūmeyi birkaç gün menzillerinde iskân ve erbâbına ba‘de’l-irâe ayb-ı fâhiş ile mu‘ayyebedir deyü kabûl ve iştirâ etmeyip geri bana def‘ ü teslîm etmekle ben dahi redd-i semen ve kabz-ı mebî‘ olunmak matlûbumdur deyü tevcîh-i husûmet[de] bulundukdan sonra da‘vâ ettiğimde müdde‘î-i mezbûrun takrîr-i meşrûhu üzere zikrolunan câriye ayb-ı mezkûr ile mu‘ayyebe olduğu ma‘lûmu oldukdan sonra ber-vech-i meşrûh müdâvâtı ve bey‘a arzı kabûl olmağla red da‘vâsı meşrû‘a olmayıp bî-vech-i şer‘î mu‘ârazadan men‘ olunduğu kendiye tefhîm olundukda müdde‘î-i mezbûr da‘vâ-yı âhara tasaddî-birle ben câriye-i mezkûreyi gāib-i mezkûr için iştirâ eyledim demesi tenâkuz olup kelâmına iltifât olunmayıp bu sûretde câriye-i merkūme Râşende müdde‘î-i mezbûr es-Seyyid Ömer’in yedinde ibkā olunup vekîl-i mezbûra şer‘an suâl dahi teveccüh etmediği huzûr-ı âlîlerine i‘lâm olundu. Fî 16 M sene [1]221.