Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 93 Hüküm no: 34 Orijinal metin no: [3b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Andon v. Yorgo’nun Tarandafile bt. Araboğlu Yanako’dan bin iki yüz yetmiş bir guruş alacağı olduğu Galata’da mütemekkin şerbetçi ustalarından Andon v. Yorgo zimmî Galata Bâb Mahkemesi’nde meclis-i şer‘-i kavîmde mu‘arrefetü’ş-şahs Tarandafile bt. Araboğlu Yanako Nasrâniye muvâcehesinde Galata’da Sultan Bayezid Mahallesi’nde vâki‘ Sarnıçlı Şerbethâne demekle ma‘rûf ma‘lûmü’l-hudûd şerbethâne Nasrâniye-i mersûme ile benim taht-ı icâremde olup şerbethâne-i merkūme derûnunda mevcûde beyne’l-hiref gedik tâ‘bir olunan âlât-ı lâzıme-i ma‘lûme dahi Nasrâniye-i mersûme ile ale’l-iştirâki’s-seviyy yedimizde mâlımız olmağla “şerbethâne-i merkūmeyi kendi mâlınla ta‘mîr ve termîm eyle ba‘dehû mertebe-i masrûfunun nısfını mâlımdan sana edâ ve teslîm ederim” deyü mersûme Tarandafile Nasrâniye bundan akdem bana emretmekle ben dahi şerbethâne-i merkūmeyi kendi mâlımla ta‘mîr ve termîm edip ba‘de’t-ta‘mîr masrûfum hesâbını bî-garaz ehl-i vukūf ma‘rifetiyle mahzar-ı şuhûdda yegān yegān rü’yet eylediğimizde mikdâr-ı masrûfum üç bin yüz seksen guruşa bâliğ olup ol vechile benim Nasrâniye-i mersûme zimmetinde bin beş yüz doksan guruş hakkım zuhûr ve meblağ-ı merkūm bana zimmetinde deyni olduğunu ikrâr-ı kat‘î ile ikrâr ve işhâd ve karz unvânıyla yedime Rûmiyyü’l-ibâre işbu deyn temessükü verdikden sonra meblağ-ı merkūmun beş yüz guruşunu yedinden ba‘de’l-ahz bâkī kalan bin doksan guruş ile cihet-i karzdan zimmetinde hakkım olan yüz seksen bir guruş ki cem‘an bin iki yüz yetmiş bir guruş Nasrâniye-i mersûmeden bi’l-mürâca‘a hâlâ taleb ederim deyü da‘vâ eyledikde ol dahi cevâbında hâl bi’l-cümle bâlâda bast olunan minvâl üzere olduğunu tâyi‘aten ve kat‘iyyen ikrâr u i‘tirâf etmeğin mûcebince meblağ-ı mecmû‘-ı merkūm bin iki yüz yetmiş bir guruşun müdde‘î-i mersûm Andon zimmîye edâsıyla Nasrâniye-i mersûme ilzâm olunduğu bi’l-iltimâs. Fî 21 M sene [1]221.