Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 93 Hüküm no: 35 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Hasan b. Halil’in kirada oturduğu evi tahliye edip sahibi Hacı Mehmed’e teslim etmesine karar verildiği Mahrûse-i Galata hâricinde Tomtom Mahallesi ahâlîsinden el-Hâc Mehmed b. Ahmed b. Abdurrahman tarafından husûs-ı âti’l-beyânda vekîl olduğu Ömer b. Mehmed ve el-Hâc Yusuf b. Abdullah şehâdetleriyle sâbit olan Mehmed Salih b. Osman nâm kimesne Galata’da mahfil-i kazâda el-Hâc Hasan b. Halil muvâcehesinde mezbûr el-Hâc Hasan müvekkilim mezbûrun tasarrufunda olan mârru’z--zikr Tomtom Mahallesi’nde vâki‘ ma‘lûmü’l-hudûd ve’l-müştemilât bir bâb menzilinde beher şehr on iki guruş kirâ ile müşâhereten müsteciri olup menzil-i merkūmun müvekkilim mezbûra lüzûmu olmağla târih-i i‘lâm şehri gāyetine izâfetle bi’l-vekâle fesh-i îcâr etmemle gāyet-i şehr-i mezkûrda menzil-i merkūmu tahliye ve hâliyeten bana teslîme mezbûr Hasan’a tenbîh olunmak bi’l-vekâle matlûbumdur deyü da‘vâ ettikde ol dahi cevâbında ber-vech-i muharrer ikrâr u i‘tirâf etmeğin mûcebince menzil-i merkūmu gāyet-i şehr-i mezkûrda tahliye ve müvekkil-i mezbûr için vekîl-i müdde‘î-i mezbûr Mehmed Salih’e teslîme mezbûr el-Hâc Hasan’a tenbîh olunduğu bi’l-iltimâs huzûr-ı âlîlerine i‘lâm olundu. Fî 20 M sene [1]221.