Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 103 Hüküm no: 53 Orijinal metin no: [5a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Giritli Ali Ağa’nın Halatçı Hacı Mustafa Ağa aleyhine açtığı alacak davasında yüz guruşa sulh olduğu Mahmiye-i İstanbul’da sâkin tüccârdan Giridî Ali Ağa b. el-Hâc Ahmed nâm kimesne Galata Bâb Mahkemesi’nde meclis-i şer‘de Galata Câmi‘-i cedîd Mahallesi’nde sâkin Halatçı el-Hâc Mustafa Ağa b. el-Hâc Ömer nâm kimesne muvâcehesinde mezbûr el-Hâc Mustafa Ağa zimmetinde cihet-i karzdan alacak hakkım olan dört yüz guruşun iki yüz yetmiş guruşunu mezbûr el-Hâc Mustafa Ağa yedinden ba‘de’l-ahz bâkī kalan yüz otuz guruş mezbûr el-Hâc Mustafa Ağa’dan hâlâ taleb ederim deyü tasaddî eylediği da‘vâsından bâ-tavassut-ı muslihîn mezbûr el-Hâc Mustafa Ağa ile yüz guruşa ba‘de’s-sulh ve’l-kabûl bedel-i sulh-ı mezkûrdan mâ‘adâ otuz guruşa müte‘allika da‘vâdan mezbûr el-Hâc Mustafa Ağa’nın zimmetini kabûlü hâvî ba‘de’l-ibrâdan müstesnâ bedel-i sulh-ı mezkûr mezbûr el-Hâc Mustafa Ağa’nın zimmetinde kalmağla taleb ederim deyü ba‘de’d-da‘vâ ve’l-ikrâr mûcebince bedel-i sulh-ı mezkûr yüz guruşun müdde‘î-i mezbûr Ali Ağa’ya edâsıyla mezbûr el-Hâc Mustafa Ağa ilzâm olunduğu bi’l-iltimâs huzûr-ı âlîlerine i‘lâm olundu. Fî 7 Safer sene 1221.