Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 102 Hüküm no: 52 Orijinal metin no: [5a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tâcir Aci Andreya’nın sandal ve ipek bedelinden Kıbrıslı Yani v. Andon’dan iki bin dokuz yüz doksan altı guruş altmış akçe alacağı olduğu Medîne-i İzmir’de mutavattın tüccârdan Aci Andreya v. Kostantin v. Nikola zimmî tarafından husûs-ı âtîde kabûlüne mevkūfe vekâlet ile vekîl olduğu lede’t-tezkiye makbûlü’ş-şehâde idükleri ihbâr olunan tüccârdan Dimitri v. Franko ve Panayot v. Kostantin zimmîler şehâdetleriyle mahzar-ı hasm-ı şer‘îde ber-nehc-i şer‘î sâbit ve sübût-i vekâletine hükm-i şer‘î lâhık olan Bakkāl Yani v. Aleksi zimmî Galata’da mahfil-i kazâda cezîre-i Kıbrıs ahâlîsinden li-ecli’t-ticâre Galata’da müsâfiren mütemekkin Yani v. Andon muvâcehesinde müvekkilim mersûm Aci Andreya zimmînin mesfûr Yani zimmî zimmetinde Rûmiyyü’l-ibâre işbu bir kıt‘a temessük nâtık olduğu üzere müvekkilim mersûm yedinden ve mâlından iştirâ ve kabz ve cezîre-i merkūmeye irsâl eylediği vezni ve zirâ‘ı beynlerinde ma‘lûm sandal ve harîr semenlerinden üç bin dört yüz doksan altı guruş altmış altı akçeden bâkī iki bin dokuz yüz doksan altı guruş altmış altı akçe alacak hakkı olmağla bi’l-vekâle taleb ederim deyü da‘vâ eyledikde ol dahi cevâbında ber-vech-i meşrûh ikrâr u i‘tirâf etmeğin alâ-mûcibi ikrârihi meblağ-ı bâkī-i merkūm iki bin dokuz yüz doksan altı guruş altmış altı akçenin müvekkil-i mersûm Aci Andreya için vekîl-i mersûme edâsıyla merkūm Yani zimmî ilzâm olunduğu tescîl ve bi’l-iltimâs huzûr-ı âlîlerine i‘lâm olundu. Fî 8 Safer sene 1221.