Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 818 Hüküm no: 1068 Orijinal metin no: [127b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva bt. Öküz Ahmed’in evini kız kardeşinin oğlu Ahmed Çelebi b. Ahmed’e hibe ettiği Fi’l-asl vilâyet-i Rumeli’nde kasaba-i Rodoscuk mahallâtından Bevvâb Mehmed mahallesi sâkinelerinden olup hâlâ bi tarîki’l-müsâfere mahmiye-i İstanbul’da Nuri Dede mahallesinde sâkine Havva bt. Öküz Ahmed nâm hâtunun zâtı Ahmed Ağa b. Kasım ve el-Hâc Mustafa b. Ali ta‘rîfleri ile mu‘arrefe oldukdan sonra meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda kız karındaşı oğlu bâ‘isü’l-kitâb Ahmed Çelebi b. Ahmed mahzarında bi tav‘ihâ ikrâr-ı sahîh-i şer‘î ve i‘tirâf-ı sarîh-i mer‘î kılıp akd-i âtînin sudûruna değin taht-ı yedimde mülk ve hakkım olup kasaba-i mezbûrede zikr olunan Bevvâb Mehmed mahallesinde vâki‘ bir tarafdan sâhil-i bahr ve bir tarafdan ba‘zen Hacı Mustafa mülkü ve ba‘zen Hatice Hâtun mülkü ve bir tarafdan Medîne-i Münevvere vakfı ve bir tarafdan tarîk-i âm ile mahdûd hâriciyyesi bir bâb fevkānî oda ve bir şehnişîn sofa ve altında ahır ve dâhiliyyesi iki bâb fevkānî kebîr oda ve bir bâb sagīr oda ve iki sofa ve tahtânî iki oda ve bir matbah ve su kuyusu ve bir halvetli bir hamam ve zât-ı eşcâr-ı müsmire ve gayr-ı müsmire hadîkayı müştemil menzilimi cümle hukūk ve merâfıkı ile merkūm Ahmed Çelebi’ye [128a] bin kıt‘a esedî guruşa bey‘-i bâtt-ı sahîh-i şer‘î ile bey‘ edip ol dahi vech-i muharrer üzre iştirâ ve kabûl eyledikden sonra semeni olan meblağ-ı mezbûr bin kıt‘a esedî guruşu merkūm Ahmed Çelebi’ye hibe-i sahîha-i şer‘iyye ile hibe edip ol dahi ittihâb ve kabûl eyledikden sonra menzil-i mahdûd-ı mezbûru mahallinde kabz ve tasarrufa merkūm Ahmed Çelebi’yi taslît eyledim, ba‘de’l-yevm menzil-i mahdûd-ı mezbûr mülk-i müşterâsı olmuşdur, keyfe mâ yeşâ’ ve tahtâr tasarruf eylesin dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min Şevvâli’l-mükerrem li sene seb‘a ve seb‘în ve elf Şuhûdü’l-hâl: Mahmud Çavuş b. Musa, Ahmed Ağa b. Kasım, el-Hâc Mustafa b. Ali, Hacı Hüseyin b. Hacı Ömer, Yusuf Beşe b. Osman, Hasan Beşe b. Mehmed, Hasan Beşe Çukadâr.