Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 107 Hüküm no: 64 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tâcir Derviş Mehmed’in İbrail’den İstanbul’a götürmesi için ortağı tarafından Reis Mustafa Alemdâr’a teslim edildikden sonra zâyi olan fasulyesinin tazmini gerektiği Tüccârdan Derviş Mehmed b. Ali Galata Bâb Mahkemesi’nde meclis-i şer‘de sefîne reislerinden Mustafa Alemdâr b. Ali muvâcehesinde bundan akdem Bahr-ı Siyah sevâhilinde vâki‘ İbrail İskelesi’nden Âsitâne’ye nakl ve bana teslîm için navl tâ‘bir olunur ücret-i sefîne ile şerîkim gāib ani’l-meclis Mustafa Beşe’nin mâl-ı şirketden reis-i merkūm Mustafa Alemdâr’a teslîm ve sefînesine tahmîl eylediğim yetmiş çuval fasulyenin altmış üç çuvalını bana def‘ u teslîm mâ‘adâ yedi çuval fasulye yedinde kalıp te‘addîsiyle istihlâk etmekle tazmînini taleb ederim deyü da‘vâ eyledikde ol dahi cevâbında müdde‘î-i mezbûrun şerîki gāib-i merkūmdan ol mikdâr çuval fasulye kabz ve sefînesine tahmîl eylediğini ikrâr lâkin esnâ-i tarîkde fırtına zâhir ve gark ihtimâli gālib olmağla sefîne-i mezbûreye hiffet gelmek için müdde‘î-i mezbûrun iddi‘â eylediği mârru’z--zikr yedi çuval fasulyeyi deryâya ilkā etmişidim deyü te‘addî vukū‘unu inkâr etmekle müdde‘î-i mezbûr ber-vech-i muharrer te‘addî müdde‘âsını isbâtdan izhâr-ı acz-birle bi’t-taleb reis-i mezbûr ba‘de’t-tahlîfü’ş-şer‘î mûcebince zikrolunan yedi çuval fasulyenin vakt-i ilkāda olan kıymetlerinden ziyâdesi mezbûr Mustafa Reis’e damân lâzım gelmediği bi’l-iltimâs huzûr-ı âlîlerine i‘lâm olundu. Fî 13 Safer sene [1]221.